انا زعلانه أوى :(
النهارده كنت رايحه امتحان ال Data base وانا واثقه من نفسى وحاسه انى راضيه جدا عن نفسى لانى كنت مذاكره كويس مع ان الماده كان فيها حفظ كتير بس لاول مره بحس انى حافظه كويس وفاهمه اللى عايز يتفهم وده لانى كنت ضايعه فيها طول الترم والدكتور بينيم فى المحاضره خصوصا ان المعمل بيبقى ضلمه علشان الداتا شو.
حتى مش حسيت بنفس التوتر اللى بحس بيه قبل كل امتحان الصبح او بالليل
وفعلا دخلت الامتحان واتبسطت لما لقيتك السؤال الاول كويس وانا حالاه فى امتحانات قبل كده ليله الامتحان.
والتانى كمان
والتالت حسيت انى خفت منه رغم انى شفته قبل كده فسبته ورحت للرابع اللى هو انا برضه حليت زيه قبل كده
ورجعت للتالت وانا مش عارفه اعمل ايه؟
حاسه ان حاجه عمتنى وخلتنى ماافهمش ان اسئلته مرتبطه بنفس ال D.B اللى هو حاطها فى السؤال التانى ولقيت نفسى تايهه ومش عارفه اعمل ايه؟
حليت برئوس الجداول وكأنه سؤال جديد وللاسف الدكتور كان جه ومشى خلاص وانا مش اخدت بالى انى هحتاج اسأل فى حاجه
ولما مش لقيت حد سأل فى نفس الحكايه قلت يبقى انا اللى غبيه ومش فاهمه ومش رضيت اتكلم.
مش عارفه
انا خرجت من اللجنه ولما عرفت فضلت احمد ربنا على اللى حصل واشكره وانا مخنوقه لان الامتحان بجد كان تقفيله سهل واجيب امتياز وبالفول مارك كمان والناس المذاكره كانت مبسوطه وانا مش عامله كويس
لما بفكر شويه بحس انه قدر من عند ربنا لانه مش اراد انى اقفل الامتحان علشان كده عمانى عن الربط بين السؤالين
مش قدامى غير انى اقول الحمد لله على السراء والضراء والحمد لله انى حمدته وقت الضيق
يلا ربنا يهون بالاتنين الباقيين
صحيح
مش عارفه هفضل لحد امتى ابلع فى تصرفات رفاء واسكت لها واسكت واسكت وانا حتى بكلمها وانا عارفه انها بتتصل دلوقت بيا تكملنى وهيا لسه مافاتش نص ساعه على كلام زى الزفت قايلاه فى حقى بدون وجه حق.
ومش عارفه لحد امتى هرضي خاطرها واقف جمبها لما تلجألى تشهدنى على حد زعلها وانا عارفه انها بتزعلنى وبتغلط فيا وانا ساكته بحجه ان ليا عند ربنا واول ماتضحك عليا بكلمتين اصفالها.
ولا مفروض انى اعاملها بمعاملتها واحرق لها دمها قصاد تشويهها لصورتى قدام الناس وهى بتستغل انى مش بدافع عن نفسى قدام الناس اللى اساسا تعرف اخلاقى وسلوكى كويس؟
ولحد امتى هفضل اتحمل سخافات دكتور زفت لمجرد ان روحى فى ايده بماده ومشروع التخرج؟!
ولحد امتى هتحمل عقاب الاء ليا بنظراتها واسلوبها الغبى معايا فى الكلام لمجرد ان ربنا خلص حقى منها وزى مافى يوم غدرت بيا دلوقت اتغدر بيها وهى حست ان ده ذنبى اللى ربنا بيخلصه وبتعاقبنى وكأنى انا اللى عملت فيها كده؟!
اوقات بحس نفسى سلبيه بسكوتى عن حقى
هو انا كده سلبيه وانا بقول يارب خدلى حقى؟
لكن كمان انا بقول انى مش عايزة اعمل حاجه فى وقت ضيق اندم عليها بعد كده لما احس انى خنقت حد بسببى او زعلته منى
انا بقيت مش عارفه اعمل ايه؟
ولا اتصرف ازاى مع الناس؟
هناك تعليقان (2):
ياستى ان شاء الله الامتحان يتصحح كويس ويكون خير
وبما انى معرفش رفاء ولا الى حصل معاها
وكمان معرفش ولاء والى حصل بينك وبينها
بس نصيحه متخليش مشاعر فرحك بجبر الله لخاطرك وانتقامه ممن ظلمك يتحول الى عجب وشماته
لانك اطيب من كده
بالنسبه للرفاء انتى اكيد الى جرائتيها على انها تتصرف معاكى بالشكل ده
ودى مش طيبه كمان دى مش سلبيه ممكن يكون مزاجك كده (فى ناس بتحب تكون مظلومه او مفعول بها فهمانى؟)
مش بقصد انك تتغابى عليها او تقطعى صلتك بيها
لكن واجب عليكى فرض احترامك ....وطبعاً احترام الغير لينا بيبداء من احترامنا احنا لنفسنا جداً
بمعنى ان عزة نفسك انتى الى بتزرعيها جواكى وتنميها حتى تصل فروعها للاخرين
انتى حد جميل متخديش كل حاجه على اعصابك
ودلوقتى لازم تدفعى مقابل الدعم الفنى ده
مش عارف هتودى الجاميل دى كلها فين
تحياتى
ابدا والله ياممكن
اعوذ بالله والله مفيش شماته خالص بالعكس الكلام ده حاصل من فتره ومع كده كنت كل ماحد يكلمنى فى الموضوع اقفله واقول دول ناس محترمين مش اقدر اقول فى حقهم كلمه وحشه
رغم ان ربنا اللى يعلم بيهم يعنى
بالنسب لرفاء لا انا مش من النوع ده -اللى يحب يتظلم بس- لانى بعرف اخد حقى وقبل كده لومتها مره وعنفتها جامد لانها كانت اتصرفت غلط كتير
لكن انا يمكن ساكتالها لاننا جروب واحد وماينفعش نبان منقسمين
انما هى مش بتقدر تعمل حاجه فى وشى وبعدين انا شريره برضو وهى بتخاف منى ماتخافش بدليل انها بتحكم سوء تصرفاتها كويس ولولا ان ربنا بيريد بكشفها حتى لو متأخر مكنتش انا عرفت
متشكرين عالدعم الفنى ده ياافندم
ربنا يديمه علينا نعمه :)
منورنى دايما
إرسال تعليق