انا خلصت هييييييييه

النهارده مش هسمي البوست مصيبات برقم لانى مش عايزة اتكلم عن الامتحان
هو كان Quality
ومكنتش راجعه مبسوطه بس دلوقت مبسوطه

مبسوطه لانى خلصت

مبسوطه لانى هرتاح من الكتب والمراجع والورق
اينعم هرجع لشغل المشاريع والسفر والبهدله علشان مشروع التخرج
يعنى حتى الاجازة مش هنرتاح فيها

بس برضو هو ده الشغل
مش الدح والحفظ والمسائل

مبسوطه لانى هخرج فى سفريات كتير
هغير جو
هرتاح واصيع انا وعبير لوحدنا
هبعد عن الخنقه
ومبسوطه كمان دلوقت حالا علشان سبب مش مهم اقوله

بس اهو كده وخلاص
ياااااااااااه مش مصدقه ان الامتحانات خلصت
هيييييييييييه
انا خلصت
انا خلصت
خلــــــــــــــــــــــــــصت
:)

خامس مصيبات ترم أول

النهارده كان امتحان ال 

facilities design

ودى بتعلمنا ازاى نقدر نعمل تخطيط ل

departments 

جوه اى مصنع وازاى كمان نرتب الماكينات وكده

الماده كان فيها كميه حفظ عجيبه وللاسف برضو كميه فهم عجيبه

المسائل فى كل شابتر كانت كل واحده بفكره والدكتور كلامه قشور فى المحاضرات يعنى بيدى عناوين بس ومعتمد على المعيده اللى ادتنا 3 سكاشن بس من اول الترم وبسلامتها مشغوله مع التمهيدى لانها لسه متعينه جديد وكمان التجهيز لان فرحها قريب 

الدكتور عاده فى مواده اللى درسهالنا قبل كده اتعودنا منه على الامتحانات الغير تقليديه وعدم الاعتراف بصعوبتها 

كنت رايحه الامتحان النهارده متوقعه اللى هيحصل زى ماحصل بالظبط لانى حلمت امبارح حلم اتحقق النهارده وعلشان كده مازعلتش

النهارده الامتحان كان 5 مسائل وبعد ما عدمنا صحتنا وجزء كبير من عقولنا فى حفظ النظرى الدكتور مش جاب ولا حرف نظرى

وكالعاده مسائل افكار انما الامتحان كان يتحل للى مذاكر كويس 

المشكله بقى انى حليت السؤال الاول وجيت ادخل فى التانى حليته غلط خالص رغم انى فاهمه وعارفه فكرته وحاله زيه قبل كده

ولحد ماوصلت اخر المسأله اكتشفت الغلط الشنيع اللى عملته من الاول للاخر ورجعت حليتها وتقريبا هى لوحدها اخدت منى ساعه وربع

كان فات ساعتين الا ربع وانا مش حليت غير سؤالين وفاضل 3

النص الاخير من الوقت او

اقل من النص كان ليه النصيب فى المسائل الاطول وانا بقيت بحل بسرعه ولا خط بقى ولا اى تنظيم ولا سطرت الورقه حتى

انجزت تقريبا بس سبت جزء صغير مالحقتش اعمله

امبارح حلمت انى رحت اللجنه متأخر لانى راحت عليا نومه ورحت بعد نص الوقت ولحقت اعمل فيه احلى من اللى فاتنى

ورغم انى لاول مره بنام وانا مش محدده هلبس ايه وانا خارجه ورغم انى برضو الصبح مكنش فيا دماغ ولا افتكرت الحلم الا بعد اللجنه

انا الصبح لبست لبس وبعد مالبسته غيرته للبس تانى هو نفسه اللى انا كنت لابساه فى الحلم :)

علشان كده رغم ان مفيش حد فى الماده دى ولا امتحانات الدكتور ده بيبقى عارف هو جاوب صح ولا لا

انا حاسه انى عكيت شويه بس عملت كويس 

من اظرف المواقف ان عبير طول اللجنه كانت بتطلب منى الاستيكه ولا اربعين مره

وانا اتخنقت منها واستغربت كده خصوصا انها طلبت الاستيكه العاديه بالذات مش الاستيكه القلم 

وانا مستغربه انها اول ماخدتها شالت الغلاف بتاعها 

ولقيتها بعد اللجنه نازله زعيق فيا مره واحده وانا مش فاهمه اتاريها ده كله كانت بتبقى كاتبالى حاجات هى عايزاها عالاستيكه

ولانى خبرتى فى الغش صفر مش فهمت كده :)

فاضل ماده يوم الاربع بس

ربنا يستر ودى نحكى حكايتها يوم الاربع باللبل لما دماغى تكون فضيت بقى 

C U

Don't forget me from eldo3a2 

:)

     

رابع مصيبات ترم أول

انا زعلانه أوى :(

النهارده كنت رايحه امتحان ال Data base وانا واثقه من نفسى وحاسه انى راضيه جدا عن نفسى لانى كنت مذاكره كويس مع ان الماده كان فيها حفظ كتير بس لاول مره بحس انى حافظه كويس وفاهمه اللى عايز يتفهم وده لانى كنت ضايعه فيها طول الترم والدكتور بينيم فى المحاضره خصوصا ان المعمل بيبقى ضلمه علشان الداتا شو.

حتى مش حسيت بنفس التوتر اللى بحس بيه قبل كل امتحان الصبح او بالليل
وفعلا دخلت الامتحان واتبسطت لما لقيتك السؤال الاول كويس وانا حالاه فى امتحانات قبل كده ليله الامتحان.
والتانى كمان

والتالت حسيت انى خفت منه رغم انى شفته قبل كده فسبته ورحت للرابع اللى هو انا برضه حليت زيه قبل كده

ورجعت للتالت وانا مش عارفه اعمل ايه؟
حاسه ان حاجه عمتنى وخلتنى ماافهمش ان اسئلته مرتبطه بنفس ال D.B اللى هو حاطها فى السؤال التانى ولقيت نفسى تايهه ومش عارفه اعمل ايه؟

حليت برئوس الجداول وكأنه سؤال جديد وللاسف الدكتور كان جه ومشى خلاص وانا مش اخدت بالى انى هحتاج اسأل فى حاجه
ولما مش لقيت حد سأل فى نفس الحكايه قلت يبقى انا اللى غبيه ومش فاهمه ومش رضيت اتكلم.

مش عارفه
انا خرجت من اللجنه ولما عرفت فضلت احمد ربنا على اللى حصل واشكره وانا مخنوقه لان الامتحان بجد كان تقفيله سهل واجيب امتياز وبالفول مارك كمان والناس المذاكره كانت مبسوطه وانا مش عامله كويس

لما بفكر شويه بحس انه قدر من عند ربنا لانه مش اراد انى اقفل الامتحان علشان كده عمانى عن الربط بين السؤالين
مش قدامى غير انى اقول الحمد لله على السراء والضراء والحمد لله انى حمدته وقت الضيق

يلا ربنا يهون بالاتنين الباقيين

صحيح

مش عارفه هفضل لحد امتى ابلع فى تصرفات رفاء واسكت لها واسكت واسكت وانا حتى بكلمها وانا عارفه انها بتتصل دلوقت بيا تكملنى وهيا لسه مافاتش نص ساعه على كلام زى الزفت قايلاه فى حقى بدون وجه حق.
ومش عارفه لحد امتى هرضي خاطرها واقف جمبها لما تلجألى تشهدنى على حد زعلها وانا عارفه انها بتزعلنى وبتغلط فيا وانا ساكته بحجه ان ليا عند ربنا واول ماتضحك عليا بكلمتين اصفالها.
ولا مفروض انى اعاملها بمعاملتها واحرق لها دمها قصاد تشويهها لصورتى قدام الناس وهى بتستغل انى مش بدافع عن نفسى قدام الناس اللى اساسا تعرف اخلاقى وسلوكى كويس؟

ولحد امتى هفضل اتحمل سخافات دكتور زفت لمجرد ان روحى فى ايده بماده ومشروع التخرج؟!

ولحد امتى هتحمل عقاب الاء ليا بنظراتها واسلوبها الغبى معايا فى الكلام لمجرد ان ربنا خلص حقى منها وزى مافى يوم غدرت بيا دلوقت اتغدر بيها وهى حست ان ده ذنبى اللى ربنا بيخلصه وبتعاقبنى وكأنى انا اللى عملت فيها كده؟!

اوقات بحس نفسى سلبيه بسكوتى عن حقى

هو انا كده سلبيه وانا بقول يارب خدلى حقى؟

لكن كمان انا بقول انى مش عايزة اعمل حاجه فى وقت ضيق اندم عليها بعد كده لما احس انى خنقت حد بسببى او زعلته منى

انا بقيت مش عارفه اعمل ايه؟
ولا اتصرف ازاى مع الناس؟

تالت مصيبات ترم أول

النهارده أو امبارح بتوقيت بعد نص الليل عدى تالت امتحان

ياااااه حاسه إن الكوابيس عماله تتزاح من على قلبى شويه بشويه

الماده كان اسمهامنظومات الخدمات والتصنيع

service and manufacturing systems 

 والمفروض انها بتتكلم ازاى تعلمنا

soft skills

هتنفعنا قدام لما نبقى مهندسين ده لو ربنا اراد يعنى

حكاية الماده دى ومشكلتها تتلخص فى اننا مكنش عندنا منهج فيها لانها كانت بتدينا مهارات ازاى ندير

اجتماع وازاى نوزع المهام فى ال
team work 

على أفراد الجروب وازاى نتعامل مع الناس بحيث نقدر نوظفهم لتلبيه رغباتنا وهكذا

محاضراتها كانت كلها فيديوهات متصوره لاجتماعات ناس بره اجانب وكنا نقعد نتفرج عليها ونحللها ونقول ملحوظاتنا
وكنا برضه ناخد

 questionnaires 

فايدتها فى الحياه انها بتعرفنا نفسنا واستايل كل واحد فينا فى التعامل وطريقه التعليم ومواصفات
  الكاركتر بتاعته ونعمل  

presentations فيها ونيجى نعرضها

الدكتور قال انه حاول يلغى فيها امتحان الترم لكن الكليه مش مقتنعه ان فى ماده مافيهاش  امتحان.

ماعلينا المهم بقى الامتحان الدكتور استغبى في شويه وجاب حاجات كانت عايزة خريجين  قسم آداب اجتماع هما اللى يحلوها مش احنا لكن اهو الامتحان كان ظريف وعدى الحمد لله عقبال اللى جاى.

نيجى بقى للمهم 

النهارده كان يوم عسل بكل معنى الكلمه مش لان الامتحان كان حلو بس انما لانى قابلت النهارده ناس كتير بحبهم وبقالى كتير مش شفتهم.

أول واحد هو استاذ محمد ابراهيم مدرس الكيمياء بتاعى فى ثانوى اللى كنت بعشقه وافتكرله موقف ظريف مش بنساه ابدا

هو كان مشهور بأن امتحاناته بتبقى معقده أوى وتصحيحه أعقد واعقد وبيدق عالكلمه لدرجه انه قالى مره ان فى طالب فى امتحان الفاينال جاب 50 من 50 فكان مفروض ورقته تتراجع وهو اللى راجعها نزل الواد ل 41 من 50:)

الموقف بقى انه فى مره ادانا امتحان وانا جبت فيه 28.5 من 30 وكانت اول مره احقق الرقم ده معاه  وكنت مبسوطه بس كنت حاسه انه برضه افترى عليا وكان مفروض اجيب الفول مارك قام قالى هو انتى شاغله نفسك ليه؟

يعنى هما اللى اتعلموا مهندسين عملوا ايه؟ يابنتى لو صوتك حلو روحى طلعى أغنيه تفرقع تعيشك سلطان زمانك طول عمرك زى بتاعت لولاكى اللى جابت مليون جنيه ف اول التسعينات:))

وده طبعا كان هزار لانى أكتر واحده فى الطلبه بتاعته عرفت تصاحبه وكمان لانه كان بيحب بلدنا لانه قضى فيها ايام حلوه ف شبابه مع انه من سكان ومواليد الزقازيق الاصليين.

أنا آه مش كلمته لانى شفته وانا فى الميكروباص وهو ماشى بس فرحت لما شفته.

والتانى بقى كان وانا فى الميكروباص برضه وانا راجعه وكان المهندس احمد يعقوب وده كان مهندس فى الشركه بتاعت التدريب بتاعى فى صيف سنه تانيه وده كان حد ّذوق لابعد حد وكنت بحتل المكتب بتاعه لانه كان منعزل وهو تقريبا مكنش بيقعد فيه.

افتكر إن اظرف موقف معاه كان  لما كنت باروح الساعه 7 الا ربع الصبح لازم اكون مستنيه عربيه الشركه فى زراعه وفى مره اتأخرت وهو واستاذ صبحى خلوا العربيه مش تمشى لما عرفوا من البنت بتاعت علوم زميلتى انى فى الطريق واخروا الكل بسببى .

وكان نفسه يتكلم معايا بصفتى بدرس فى نفس الكليه اللى اتخرج منها وكمان البنت الوحيده فى الشركه هندسه والباقيين كلهم علوم بس كان محرج يتكلم لحد اليوم ده وانا فاكراه مش يعرفنى قالى انتى "..." صح؟

قلتله تمام هو حضرتك تعرفنى قالى سألت عن البطله اللى وافقت تتحرك فى مصنع فيه 490 راجل ومافيهوش ست واحده واثبتت أنهاأخلاق وشخصيه :)

وخلص الكلام وفى نفس اليوم المهندس محمد أنور اللى هو مديره ادانى فايل مليان ورق وزنقنى انى اقعد ادرسه وقالى علشان اخد راحتى اقعد فى مكتب المهندس احمد يعقوب

وفتحولى المكتب وانا معرفش انه هو ده اللى كلمنى

لحد مادخل ولقانى فى وشه قاعده على مكتبه قالى هو انتى ؟؟!!!

:))

وفضل بقى يحكيلى عن بنته ويورينى صور عيلته ومراته وبنته 

بجد كان حد حبيته واحترمته جدا جدا وفرحت لما شفته مع انى حتى مش سلمت عليه ولا اخد باله منى.

وانا راجعه كمان قابلت العيال صحابى بتوع طب اللى مش شفتهم بسبب ظروف الدراسه ولو حتى صدفه بقالى حوالى سنه وكانت قعدتهم زى العسل فى الباص.

أهو كان يوم حلو وخلاص وكنت حاسه نفساويتى مرتاحه جدا الحمد لله.

الدور على يوم الاربع ربنا يستر

C U

Don't forget me from Eldo3a2
:)

تانى مصيبات ترم أول

كنت ناويه انى اجى كل يوم حد واربع بعد الامتحان هنا واحتفظ بذكرى كل امتحان علشان طول ماالمدونه دى موجوده انا افضل ابغض الترم ده لا السنه بحالها.

بس امبارح بقى ماقدرتش خالص كنت راجعه عندى صداع مزمن ومنهكه من التعب لدرجه مش قادره افتح عنيا.

والمشكله انى ماقدرتش انام منه فرحت اسلم على عمو اللى مسافر خلاص وعز عليا اوى انه خلاص هيمشى بس هو فرحنى بخبر كويس انه وهو مسافر هينزل فى السعوديه يعمل عمره لبابا وبعدين يكمل سفره. انا بوسته على الحكايه دى بصراحه ودعيت ربنا انى يقدرلى انا كمان احج لبابا وده طبعا لما احج انا الاول :)

المهم دلوقت احكى بقى الموجز.

الماده دى كانت أسوأ المواد من حيث ظروفها لاكتر من سبب.

اولا لانها كان مقرر علينا فيها مرجعين مش واحد ومش كتب عاديه.

وثانيا لان الدكتور اساسا مكنش بيشرح هو كان بسلامته مقسم المنهج على عدد الجروبس اللى فى الدفعه وكل جروب يذاكر شابتر ويعمل فيه بريزنتيشن ويجى يشرحه للباقيين. وللاسف مرجع فيهم كان عايز دكتور طبيب اللى يذاكره مش مهندس لانه عامل زى الاناتومى بتاع طب وبيتكلم عن تهيئه وضع العمال ف المنشآت الصناعيه فحكايه فهمه كانت صعبه او مستحيله.

وثالثا المرجع اللى كان شغل المشروع بتاع الماده فيه الدكتور نفضله وجاب منه سؤال واحد فى الامتحان وجاب اربع اسئله فى التانى اللى هو اساسا كان كلامنا فيه كله نظرى والدكتور مش شرح فيه ولا مسأله وفى الاخر جاب الامتحان كله مسائل.

الكارثه الكبيره ان الدفعه كلها كانت لاول مره بتذاكر الماده فى اليومين اللى قبل الامتحان لاننا لو كنا حاولنا ننقذها قبل كده كنا ضيعنا وقت الخمس مواد الباقيين.

مروا على الدفعه كلها يومين مايعلم بيهم الا ربنا وانا معرفش كانت شحنه برود نازله عليا او هدايه ربانيه معرفش لحد العصر اليوم اللى قبل الامتحان حسيت انى عندى مغص وهموت من القلق لدرجه فقد التركيز.

استعنت كتير بالقرآن والصلاه لكن القلق كان صعب بجد.

حظى السئ كان ان الدنيا كلها مقسمه نفسها مجموعات وكل واحد يذاكر شابتر او اتنين ويجى يشرح مسائلهم للباقيين خصوصا ان الامتحان open book يعنى مش محتاجين نحفظ بس نفهم لكن مشكلتى ان اللى كانت معايا كانت عبير وهى تعبت اليومين دول واضطريت انا اشيل الليله لوحدى علشان اشرحلها كمان قبل الامتحان وبدال ماهى تشيل عنى 3 شابتر شالت واحد ومش كملته كمان وانا كنت ضايعه.

يمكن ربنا اعانى جدا ووقف معايا وحسيت ان دعوات الناس نفعتنى لما لحقت فى اليومين اخلص كل الشابترز وكنت لاول مره اذاكرها بس الضغط على اعصابى كان بشع.

اسوأ مافى الموضوع ان الدكتور جاب الامتحان بشع بجد وتناسى كل الظروف اللى هو يعرفها كويس وكل الدفعه كانت طالعه اما مهيسين او وشهم احمر من الغيظ والقلق والخوف من السقوط وكله بيقول حسبى الله ونعم الوكيل.

انا شخصيا كنت طالعه مهيسه اه لكن حاسه انى حليت افضل ماتوقعت بكتير.

اللى غاظنى بجد ان الدكتور جه يشوف استفساراتنا فى الامتحان ولقيناه مش مدرك ان فى سؤالين هو حاططهم احنا عرفنا رقم الشابترز بتاعتهم بالشبه بتاع الكلام وماكناش عارفين هنعمل فيهم ايه اصلا ولا ايه قوانينهم علشان نخرجها من الكتاب.

وهو كل مانسأله يقول دول سهلين ياجماعه انتوا بتستهبلوا يعنى مش مدرك اساسا ولا معترف بأنه افترى علينا بجد فيهم.

المشكله كمان انه جايب داتا كتير ناقصه فى الامتحان وانا كل مااحس ان فى حاجه ناقصه اقول اكيد انا مش فاهمه واقول مش هوقف نفسى انا هفترض اى رقم مش عارفه اطلعه ولما شرف بسلامته ارض اللجنه لقيته بيقول assume اى داتا ناقصه لما الناس كمان اشتكوا من انهم فى حاجات مش عارفين يطلعوها وان فى اسئله مش مفهومه عرفت انى كده فى السليم.

الحاجه الوحيده اللى ريحت ضميرى هى انه قبل مايمشى قال اى حد عنده سؤال تانى قبل ماامشى قلته روح خلاص يادكتور ياريتك ماكنت جيت :)
بصلى وضحك باستغراب قلتلته اه ياريتك ماجيت ده انا فى المسأله الاولى كان عندى حل اكتبه مجيك ده خلانى مش عارفه هكتب ايه؟!

والله مجيك ده واقف علينا بخساره
الراجل بصراحه قدر اننا فى امتحان واعصابنا تعبانه وقالى حلى يامصيبه وانتى ساكته :))

عندى يمكن حاجه مش فاهماها
ليه دايما بيجيلى صداع مزمن فى قلب اللجنه وبجد بيفقدنى جزء كبير من تركيزى ومع كده بنسى اخد اى مسكن او اسبرين معايا وبقعد اضرب دماغى فى الديسك وانا بمتحن؟!

بس انا برضه اروبه وتخلصت منه بأنى نمت من 9 امبارح ل 9 النهارده يعنى 12 ساعه متواصله ولسه هبقى اكمل اخر النهار :)

الدور على ماده يوم الحد
ربنا يستر وهحكى حكايتها الغريبه هى كمان المره الجايه فى التقرير التالى.

C U
Don't forget me from eldo3a2
:)

اول امتحانات ترم اول

لقد امتحنت اليوم فى تمام الساعه الواحده والنصف بعد منتصف الظهر أول المواد العجيبه بتاعتى فى الترم المنيل بنيله فى السنه اللى باينه من اولها دى.
الماده كان اسمها Expert Systems بتحكى عن الانظمه الخبيره وليالى الذكاء الاصطناعى والمشكله ان فاقد الشئ لا يعطيه.
الماده عباره عن كتله غباء فى غباء.
الدكتور ربنا يسهله بلاش الكلمه التانيه عارف ان احنا ماكناش بناخد سكاشن وان المعيده منها للى حدف مراته من البلكونه كل مايكلمها علشان تدينا سكشن يلاقيها نايمه نامت عليها حيطه البعيده.

ويوم ماربنا يكرمنا وناخد سكشن يدينا معيد غير المعيده والمشكله ان الماده اصلا مش تبع القسم بتاعنا.

رغم انى كنت نايمه امبارح وانا حاسه بقمه الرضا عن نفسى لانى مذاكره الماده دى كويس مع انى مش فتحتها غير مرتين بس لضيق الوقت كنت نايمه مغمضه عين ومفتحه عين واقل همسه كانت كافيه تصحينى مفزوعه من النوم.

اتفاجئت الصبح وانا صاحيه بدرى علشان انزل اشرح لعبير الحاجات اللى هى مش فاهماها ان رغده قرفانى مسدات عالموبايل قلت اتصل اشوف فيه ايه؟ لقيتها بتقولى ان فى ماده العيال بتوع باور بياخدوا فيها نفس المنهج لكن تحت مسمى robotics والامتحان بتاعها معاها والحل كمان ولو اقدر انزل علشان اشوفه لان فى حاجات احتمال يجيلنا شبهها خصوصا اننا داخلين نشوف الاسئله لاول مره وده لان المنهج مش ثابت من سنه للتانيه ف مفيش نماذج سابقه.

احترمت اوى تصرف رغده ويمكن ده كان محاوله لتصليح موقف ندل اوى هى عملته قبل كده من سنتين وهى عارفه انى مش بتأخر عنها او غيرها وكل اللى مش فاهم حاجه او ناقصه حاجه بكلمها ليه.

لكن اتغظت اوى لما افتكرت مكالمه نورهان هانم امبارح الصبح لما اتصلت وصحيت لها من النوم علشان تكمل حاجات ناقصاها ومع كده لما سألتها هو فى ورق جديد غير اللى معايا لانها عارفه انى مقاطعه الكورسات ومش باخد خالص قالتلى لا رغم ان الامتحان اللى رغده جابتهولى كان معاها.
لكن ماندمتش لانى ببساطه بقالى خمس سنين بدى وبيتنكر الجميل يبقى الاهم ان ربنا شايف وعارف.

الدكتور بقى جاب امتحان زى الزفت وعايز يتحل فى 5 ساعات مش 3 وقال ايه الامتحان واضح.
روح ياشيخ وعندى كلمه واحده ليك " روح منك للى كلت دراع جوزها هى تخلص حقنا منك "

الماده الجايه اكبر المصايب والبلاوى
لسه لاول مره هفتحها ودى حاله نادره عمرها ماحصلت قبل كده.
ربنا يستر خصوصا ان الامتحان يوم الاربع يعنى مش قدامى الا يومين اتنين
يالهوتىىىىىىىىىى
والله قعدتى دى حرام حرام حرام

كان هذا موجز انباء اول ايام الامتحانات ونلتقى كل حد واربع مع موجز جديد لانباء الامتحانات فى السنه اللى مش باينلها لون دى.

المراجع تاندينى هل من مجيب؟ !!

ملحوظه ظوغنططه
انا اخدت عهد ان دى اخر سنينى فى الكليه ربنا ييسر ومش هزعل على اى حل حليته وحش وذلك لان بقيت مش فى دماغى غير ان السنه تخلص مع انى كان نفسى اطلع السنادى بامتياز لانه كان هيفرق معايا فى التراكمى انما شكلها لو صفصفت على جيد يبقى اشطه.
النهارده حليت كويس بالنسبه يعنى اكتر ماتوقعت لكن الاعتراف بالحق فضيله الحل وحش والامتحان اوحش.

جود باى
سى يو الاربع بقى :)

كرهت المعتقل

والنعمه ورحمة أبويا ده حرام

هو ايه اصله ده؟

هو انا كل ما اقول قربت اخلص الماده وهنط خلاص عاللى بعدها واعمل انجاز الاقى حاجه بتطلعلى ناقصه تقولى ذاكرينى انا فى المنهج

يوه انا قربت اطق

قال والدكتور بسلامته زعل اوى منى وانا قاعده معاه فى المكتب وبقوله ايه يادكتور النظام البتاع ده كبير اوى وانا شايفه انه مالوش لزوم مادام عملنا فيه مشروع يقوم يقولى بتاع؟!!!!!!!!

اه يادكتور بتاع ايه كبير عليها يعنى؟

يقولى انتى غاويه تحرفى دمى؟

قلتله يادوك مش عارفه هويتها ايه ولا عنوانها ايه اقول عليها ايه ؟ اللى ماتتسماش يعنى؟ :)

وحسيت ان الراجل لولا انى مصاحباه وبيحبنى حبتين كان حدفنى بره المكتب

وجاى بكل فخر يقول انتى زعلانه ليه ده انا حتى مش اديت لكوا غير 3 محاضرات بس بعد الميد تيرم

اسم الله على مقامه مايعرفش ان فى واحده بس فيهم واقفه علينا ب 90 صفحه فى المرجع ياريته كمان كتاب :((

طب اعمل ايه انا دلوقت يعنى؟

فاضل الماده الكبيره والامتحان يوم الحد

اعمل اييييييييييييه؟!!!!!!!!!

هو اى نعم انا مش حارمه نفسى من حاجه وبسمع حاول تفتكرنى بتاعه حليم ومش عارفه هى معششه فى نافوخى ليه اليومين دول وبقعد اهيس وانا بسمعها بس برضه فى حاجه ناقصه

فى حاجه ناقصه

فى حاجه ناقصه

فى حاجه ناقصه

اممممممممممممممم

ايووووووووون ........هى النوم

انا احلى حاجه يعنى

انا حاسه انى مش بنام كتير هما حوالى 7 ساعات كل يوم واوقات 8 وده حرام

انا انام وخلاص واللى يعمله ربنا يكون

المشكله ان ال 4 ايام اللى البت عصير قصدى عبير قعدتهم معايا فرقوا معايا ومعاها وكنا بنذاكر سوا ومقسمين الليله السوده دى انما دلوقت هى روحت

وانا مش لاقيه حد يشجعنى

واللى بينرفزنى بجد بقى انى ابقى سهرانه بقرد لوحدى نص الليل ولحد الفجر فى السقيع والتلج والبيت كله نايم

قال وايه امبارح قاعده بفرغ همى فى ماما اللى صعبان عليها حالى

ولما اشتكيت لها زهقت منى وسابتلى الاوضه وبقولها امتى بقى يجى عليا شهر واحد ده وانا نايمه تحت البطانيه-عماله ابوس فى البطانيه-

تقوم تقولى ذاكرى انتى وانتى تخلصى ...طب هو انا ناقصه غم

ععععععععع مش بقول ده ظلم

لا

الموضوع محتاج وقفه

ياخدوا كل حاجه ويسيبونى اناااااااااااااااااااااااااااام

ملحوظه ظوغنططه:

المعتقل اللى هو عنوان التهييس هو اوضتى وده الاسم اللى اطلقته عليها ماما من كتر ماانا بغطس فيها واغيب عن العالم الخارجى حتى الشباك دايما مقفول.

وثانيا اوعى حد يفتكرنى البت الرايقه اللى مرزوعه بتذاكر فى الصوره دى كأنها حابه الحكايه اوى دى والنعمه شكلها بترسم مش بتذاكر.

انا انفع الصورة اللى مطرشأه دى

انا هروح انتحر بقى يالا باااااااى

ابقوا ازعلوا عليا ياعيال مش عايزة قلة اصل

أول ايام 2009

مبدأيا كده الصورة دى مالهاش أى علاقه بالموضوع غير انها عاجبانى من أول ماشفتها وحاباها أوى لبرائتها فرحت حاطاها :)

أول أيام سنه جديده
قبل ماانام فضلت أقول يارب يسر الاحوال واقوم الصبح رايقه علشان أبدأ يوم جميل
وقلت من ضمن الغلاسه هصحى الصبح لو لقيت وشى رايق يبقى اليوم هيبقى تمام ولو مكنش لا قدر الله يبقى ربنا يستر .

الحمد لله صحيت الصبح وشكلى عجبنى فى المراية :)
خصوصا إنى فتحت عنيا على صوت مسج جميله من حد أجمل بيقول كل سنه وانتى طيبه
قلت اشطه اليوم هيبقى تمام

لبست وشربت القهوة اللى هتودينى فى داهيه ان شاء الله وخرجت علشان اقابل العيال اللى مفروض انهم هيظبطوا الماده اللى مش عارفين نذاكرها هى والاتنين اخواتها التانيين والمفروض ان مابقاش فى وقت كل واحد يلم كل المواد لوحده.

خرجت من البيت وانا حاسه انى مبسوطه ومن غير سبب غير انى عزمت انى ابدأ السنه بابتسامه.

مكنتش لابسه لبس جديد ولا حتى كلاسيك لكنى كنت رغم انى لابسه سبور بس كنت حاسه ان شكلى حلو.

ولاكتر من موقف ظريف مكنتش برد غير ببسمه حتى لو من جوايا وكنت حاسه ان الناس كلها بتبص عليا رغم ان ده مش حقيقى بس منطلقه كده :)

ركبت العربيه وكان جمبى راجل عجوز بس شكله طيوب اوى وشايل حفيده على رجله
حفيده كان زى القمر وكان عمره كام شهر.

انا مكنتش واخده بالى منه فى الاول بس لفت نظرى انه كان عمال يتلفت ويبصلى -البيبى الصغير مش جدو-
وانا كنت هموت والاعبه لانه أمور اوى لكن كنت مكسوفه من جده
وفى الاخر ماقدرتش اقاوم خصوصا ان الولد كان لابس ايس كاب اصفر وهو ابيض وامور اوى وسأِلت جده عن اسمه قالى احمد

المهم كمل البوم من غير شرح وضاع هدر ماطلعتش غير بشويه ورق وقررنا انا وعبير ننزل نشتريلها برالينه ونعمل القيزا كارد اللى بتتحايل عليا بقالها شهر تعمله .

فضلنا واخدينها تمشيه من عند المستشفى عالبحر لحد ماوصلنا المحافظه وهناك ووانا بتكلم فى الموبايل مره واحده عبير اتفاجئت بأنى الفايل وقع منى هو والموبايل عالارض وانا لحقت نفسى بإنى اترميت على التنده اللى جمبى ومش قادره اخد نفسى من الم فى جمبى وبطنى.

قفلت هى المكالمه مكانى وساندتنى لحد ما ارتحت وقمنا كملنا المشى ومعرفش لحد دلوقت ده كان من ايه؟
ودى الحاجه الوحيده الوحشه اللى حصلت.

ومن أغرب المواقف الولد العجيب اللى كان فى المحل وحركاته وطريقه كلامه اللى بتقول انه عايز ينام تقريبا بس اكتشفنا فى الاخر انه ده الطبيعى بتاعه .
الولد كان بيفصل فى النص وبيتنح وأنا ياعينى ببقى غلبانه اوى ومش بعرف اتصرف ولان عبير عارفه كده رحت استخبيت فيها وهى فضلت تتريق على الولد وتقول عليه مش طبيعى علشان يتهد ويفهم انها بتشتمه وده ولا هنا.

كمل اليوم وكان اخره تهييس واول ماسبت عبير قابلت بالصدفه واحده صحبتى فى صيدله من البلد وروحنا سوا وفضلت اتريق عليها لانها قاعده تطلب منى انى اجيبلها أغانى عجيبه على الايبود وانا مش بسمع الاغانى دى ولا الاستايل ده.

ولحد ماوصلت البيت الحاجه اللى كانت قرفانى هى التعب وغير كده اليوم كان لذيذ .

ده مع الوضع فى الاعتبار انى مش راضيه اكتئب علشان عندى اكبر 3 مواد معرفش عن مناهجهم حاجه وفاضل اسبوع على امتحانات الفاينال :((

يارب تكمل السنه على كده يارب

حصاد 2008

هو انا فضلت قاعده اقول المناسبه دى ماتعديش من غير ما يتقال فيها كلام

حسيت انى عايزة افضى شويه من زحمه الافكار اللى عماله تتحرك فى دماغى يمين وشمال

مش عارفه لقيتنى بعد ماصحيت وكانت الساعه 1 الا ربع يعنى الناس كلها خلصت معايدات وانا نايمه لقيتنى عماله افتكر عملت ايه فى 2008 وعجبتنى اوى الصورة لانها بتقول مهما بعدت السنه عن الموج مسيره يوصلها ويمسحها

لقيت average السنه انها بتقول سنه وحشه والمفروض انى انسى اللى حصل فيها لكن ابقى على الدروس اللى طلعت بيها منها.

تقرير السنه كان كالتالى

شهر 1 : النص الاول منه كان بيقول سنه ماعدتش عليا وكنت بدعى ربنا تكمل على كده لكن الحمد لله اسبوعين واتقلبت موازين السنه وعرفت انها سنه مش هيعدى عليا اسوأ منها وقد كان.

الدرس المستفاد مش كل اللى تشوفه بعينك تصدقه لانه ممكن يبقى برواز نحاس مطلى بميه دهب.

شهر 2: نهايه الامتحانات بحاله سيئه جدا وتنبؤ بنتيجه مش مرضيه وحالة من الضياع ولا احسن ومن بعدها احساس بالندم على اللى فات واحساس بالندم انى فى يوم قلت على واحده انها صحبتى مع انها مش تستاهل انى حتى انسبها ليا كزميله

الدرس المستفاد أوقات الطيبه الزياده بتبقى نقمه على صاحبها يعنى قد مانقدر لازم مانكونش طييبين.

شهر 3: الضياع بيزيد وحالة نفسيه سيئه فوق التصور

الدرس المستفاد أوقات لما بندى للدنيا فوق حجمها بتدوس علينا فلازم نصغرها علشان نفضل أكبر منها.

شهر 4: نتيجة الترم واحساس الذنب ودمار اللى اتبنى لكن لسه كان فى أمل انى اقدر اغير والحق نفسى

الدرس المستفاد ماينفعش نفضل مكسورين لاننا أكيد ربنا بيبقى سايبلنا قوة فاضله علشان تخلينا نكمل يبقى لازم ندور على القوة دى فينا

شهر 5: يوم 1 اجمل ايام السنه أول يوم انشر فيه مدونتى الرئيسية واحساس جميل بإثبات الوجود.

وأيام الترم التانى وضغط الكليه بس اصرار على تعويض الخساره وفعلا ضغط امتحانات.

الدرس المستفاد اللى عايز يبقى حاجه أو يعمل حاجه بيعملها مهما كانت الظروف والاستستلام سيد قواد حالة الدمار.

شهر 6: اعظم شهور مشاكل البيت وتعب الاعصاب واحساس العزلة واول مرحلة اللجوء للكمبيوتر كوسيلة لتلاشى الصدامات عن طريق المدونه.

الدرس المستفاد أوقات بنبقى سلبيين لاننا ببساطة مش قادرين نبقى ايجابيين وده بيبقى غالبا حل كويس واللجوء ليه مريح

شهر 7: الهروب بسفر التدريب والقعاد بره فى مكان مختلف والتعامل مع ناس مختلفين والعيشه فى عالم مختلف وبالتالى خروج كبير من مود الضيق وبدايه نص جديد من السنه لعله يكون سعيد.

الدرس المستفاد بأيدينا ممكن نبقى اللى احنا عايزينه لكن لو قدرنا بجد ننسى او نتناسى اللى ممكن يرمينا ورا.

شهر 8: استمرار فى حالة الخروج من الخنقه والملل واحساس جديد بالخروج من الجلد القديم وقدر ربنا فى إن حقى يتردلى واعتبارى يترد وبالتالى فرح كبير مع الحزن على العالم الجديد اللى كان عمره شهر ونص بس لكن بخبرة 21 سنه قبله وكمان النتيجه اللى جت عوضت اللى قبلها وعرفتنى ان السنه مش راحت هدر وان بجد ربنا كبير ومش بيخذل اللى بيلجاله.

الدرس المستفاد مش المفروض نزعل على حاجة حصلت غصب عننا لانها أكيد ربنا بعدها هعوضنا عنها ومش لازم ابدا اشترى اللى يبيعنى لانه مادام باعنى يبقى اكيد مش يستاهل انى اشتريه لانه مش هجيب تمنه

شهر 9: بداية سنه دراسية جديدة ومود مش وحش لانه رمضانى

الدرس المستفاد ماينفعش نمشى من غير مانحط لنفسنا strategy او outline نتحرك بيها لاننا أكيد هتقابلنا صدمات كتير محتاجه تفكير.

شهر 10: بدايية الاحساس بضغط سنه مش سهله وبدايه للاحباط من النتايج ومتقصير منى أنا فى حقها رغم امنيتى إنى اعديها علها بمكسب مش خساره وصدمات كتير من ناس بحبهم وكنت فاكراهم يستاهلوا ولكن الاقنعه بتسقط وتكشف المستور عند أول موقف للاثبات

الدرس المستفاد ليس كل مايتمناه المرء يدركه وغالبا ماتأتى الرياح بما لا تشتهى السفن

شهر 11: وتستمر حملة الصدمات ف الناس وضغط نفسى فوق الوصف بسبب الكليه ومشاكل اصحابى والاكتشاف الاعظم بأنهم مش اصحابى اساسا. وافتتاح مدونتى الجميله دى ويوم عيد الحب تحديدا وبالصدفه البحته فى محاوله لاسترداد نفسى واللى شافت منى نكد كتيييييير.

الدرس المستفاد اوقات ببقى عارفه انى عبيطه وبستمر فى عبطى ولازم اتخلص من العبط ده.

شهر 12: فضيت دماغى من معظم الكون حواليا واستراتيجيات جديده للتخلص من الناس اللى مالهمش اهميه ووضعهم كصور بس لازم يكتمل بيها البرواز رغم استمرار مود الاكتآب والحزن اللى اوقات كتير كان بيبقى مش غير سبب يستدعى ده انما احساس داخلى.

الدرس المستفاد أوقات كتير مش بنبقى عايزين نكون لان اراده ربنا الا نكون فلازم نرضى بما هو كائن حتى يقضى الله أمرا

يمكن كان فى كلام اكتر انما ده اللى كتبته صوابعى على الكى بورد ومش هراجعه ولا هغير فيه.

المهم انى حاسه انى محتاجه امسك ورقه وقلم واعرف انا عايزة ايه واستعين بربنا إنه ينصرنى ويقوينى إنى اعمله

عايزة احط خطة لكل حاجة واخده حيز فى حياتى أو جزء من وقتى وتفكيرى علشان امشى بيها علشان ماتعديش عليا 2009 زى 2008 .

هحاول ابدأ صباح يوم 1/1 /2009 بابتسامه واحاول احافظ عليها ده لو قدرت انسى بجد الحصاد اللى طلعت بيه من 2008 وشغل حيز كبير من دماغى للدروس المستفاده.

كلامى معظمه خطط يمكن لان الكليه لحست دماغى اربع سنين وهى بتعلمنى ازاى اكون مهندسه تخطيط شاطرة.

ورغم كده حاسه انى بفشل فى تخطيط حياتى.

مانساش اقول انى اكتشفت ان اوقات كتير بنبقى شاغلين نفسنا بحاجات وناسيين اللى مفروض انهم شاغلين نفسهم بينا .

ومانساش مكالمه عبير علشان تقولى happy new year بابتسامه .

وماانساش ان عيد ميلاد اخويا النهارده مع ميلاد سنه جديده اتمنى تكون سعيده عليه

وماانساش انى اصلا محتاجه تكون السنادى غير اى سنه ف حياتى

وماانساش اقول برضه

عام جديد وعلى عملى شهيد فأعنى ياربى على اغتنامه فى طاعتك ورضاك

وأخيــــــرا

Happy 2009 hope to be 2009 wide better than 2008 and any year before

Happy new year :)