كرهت نفسى

القرب حقيقى مش بالمسافات

ياما ناس بينا وبينهم مسافات لكن قريبين مننا واقرب لنا من نفسنا
وناس قريبين مننا وانفاسنا بتلمس انفاسهم لكن ابعد عننا بعد السما عن الارض

عبير معايا دايما وهى قريبه منى اوى لكن اليومين دول مش عارفه مالها ومالى كمان
اتصدمت لما لقيتها بتقولى انى مش حاسه بيها ومعرفش عنها حاجه
وبتقولى انى مش حاسه بنفسى ومابقتش عارفه انا بعمل ايه؟
ولما جيت سألتها ليه تبقولى كده انا عارفه انى ملغبطه ومش مظبوطه لكن انا متأكده انى مش زعلتها ومش عملت حاجه تخنقها

مالقيتش عندها رد يعنى جرحتنى بالكلمه بدون مبررات
ممكن تكون بتقول كده لان الكليه مش مديانا فرصه نتكلم لكن انا اتوجعت

والنهارده كانت غريبه وامبارح كمان مكنتش عارفه اتفاهم معاها خالص
وكاتنت عماله تغلط فيا عمال على بطال وانا بقول مادام مش مظبوطه هتحملها

بس تعبت اوى لما جت خلصت الشغل وجيت اكلمها واهزر معاها علشان تحكى وتخرج من المود وفى الاخر بقولها قبل تصبحى على خير

على فكره وحشتينى وعايزاكى ترجعيلى
اخدتها بتريقه وهزار

اتخنقت بالدموع وقلتلها كده رجعت هزرت وسألتنى مالك شكل الواد بتاع محل الهدوم هو اللى حسدنا على علاقتنا ببعض وكلام كتير حسيته من ورا قلبها

مكنش منى الا انى قلتلها ماتشغليش بالك وبدأت اتقنع حتى عليها

ولا مى اللى بكلمها مش بترد عليا
اانا مش عارفه اصحابى مالهم

انا عارفه انى بقيت مش بتحمل حد وممكن اكون بتعبهم معايا

بس هى دى الحقيقه
انى بقيت مش بتكلم وهاديه زياده عن اللزوم وهزارى قل وحتى مابقيتش عارفه اكون خفيفه الدم

بس هما مفروض يبعدوا عنى لانى مابقيتش متحمله
واذا كنت مش بغلط وزعلانين لانى بعيد يبقى يبعدوا هما عنى

ومش عايزه اصحاب

أيام ملخبطه

امبارح كان يوم لذيذ

يمكن لان ايامى اللى بقضى معظمها مع عبير بتبقى كويسه لانها بتعرف تخرجنى من مودى كويس ومش بتسيبلى فرصه للاكتآب وكمان لانها بتعملى كل اللى انا عايزاه وبتحسسنى دايما وانا معاها انى مسئوله منها وبتعاملنى كأنى البنت اللى ماشيه مع مامتها مستخبيه فيها لانها بتخاف عليا من اى مواجهه مع اى حاجه او حد.

عبير الوحيده اللى بتحسسنى قد ايه انا ضعيفه من جوه
يمكن لانى بحس انى لو عشت اللى هى عاشته كان زمانى فى مصحه نفسيه من زمان واول مااصطدمت بمشكله كبيره احزنتنى جتلى ازمه نفسيته ونمت اسبوع فى السرير :(

خلص اليوم فى الجامعه بدرى وكان مفروض نمشى 12 ومش عارفه ليه اتكسفت اطلب منها انى اقضى معاها بقيه اليوم ومش اروح بدرى الا انى لقيتها بتطلب منى اننا نروح البنك نحط فلوس فى الفيزا

فرحت اوى وطلبت منها اننا نتمشى لحد هناك مع اننا كنا تعبانين اوى
وبالصدفه لقينا البنك بيقفل بابه وال ATM واقفه
فقلنا نستناها شويه

وعزمتنى على ايس كريم وانا كان نفسى فيه بقالى فتره واتبسطت اوى لما الراجل قالنا انه اوقات بيكسب واحده تانيه وانها بتحصل كل 100 واحده وانا بفرح بالمكسب زى العيال الصغيره لكن طول عمرى ماليش بخت فيه

وصلت للاخر ولقيت الورقه كسبانه وضحكت سخريه منها لانى كسبت وهى لا وفوجئت انها كمان كسبت وفضلت تطلعلى لسانها حتى اتصورنا صور عار واحنا بناكله
وفضلنا نضحك وضيعنا الوقت هناك وبرضو مشينا من غير مانحط الفلوس

لكن النهارده زعلت :(

زعلت لانى ماتصورتش انى ممكن اتصل بيها 10 مرات وماتردش عليا واحنا فى الجامعه لمجرد انها خايفه اكون عايزاها علشان نقابل دكتور مشروع التخرج
مع انه اصلا مجاش وانا مكنتش عايزاها علشان كده

بس حسيت انى ندله لما لقيتها ظهرت بعد ساعه تقريبا من اتصالى وبتتكلم فى التليفون وشكلها متعفرت من حاجه وانا لانى كنت بحاول اتلاشاها ومش اتخانق معاها قدام رفاء ماوقفتش استناها لما تخلص ومشيت من غير مااعرف مالها

حتى لما كلمتنى وانا نايمه علشان نتفق هنتقابل بكره ازاى علشان نروح العاشر للراجل اللى هيعلمنا نعمل شغلنا اوتوكاد ازاى رديت عليها رد واقف وقلتلها انى نايمه ومش هقدر اتصل بيها عالبيت علشان فى ناس فى الصاله

وحتى لما كلمتها من شويه وسألتنى ليه ردى عليها جاف قلتلها هقابلها ازاى بس؟ وانى مش عايزه اتكلم دلوقت لانى حاسه انى لسه مخنوقه منها واحتمال لو اتكلمت اتخانق وانا مش عايزه ازعلها

هى برضو مش الحت فى السؤال ورغم ان صوتها متغير الا انى برضو ماحاولتش اطول فى الكلام
ورغم ان المبرر هو انى مش عايزه اتكلم دلوقت لانى لسه مخنوقه ومش عايزه اخنقها منى بس برضو حاسه انى مكنش مفروض اعرف انها مخنوقه من حاجه ومش اسألها او احاول اطمن عليها مع انى هموت من القلق عليها:(

طيب بعند مع نفسى ليه؟
وبيجى على دماغى فى الاخر

اوقات بحس انى غريبه
ايه ده؟! صحيح ماانا غريبه فعلا :)

؟؟!!

حالة غريبه عايشاها
مش عارفه هى كويسه ولا وحشه؟
بس غالبا هى مش كويسه

حالتى هى "مش عارفه"
حالة فيها كل ردودى على اسئلتى اللى مش بتبطل لنفسى
اجابتها "مش عارفه"
وأى اسئله اتسئلها من اى حد برضو ردها "مش عارفه"

بقيت مش فاهمه نفسى
او بالاصح فاهمه نفسى بس مش عارفه اتعامل معاها

جربت اسأل نفسى عايزة ايه؟ الاقينى معرفش
طيب هتموتى من ايه؟ الاقينى معرفش
طيب بتعملى اللى بتعمليه ليه؟ الاقينى معرفش
طيب بتحبى ايه؟ الاقينى معرفش
طيب نفسك فى ايه؟ الاقينى معرفش

عايشه حاله ضياع مش عاديه
مش حاسه لا بحاجه تفرح ولا حاجه تزعل
الدنيا عندى لونها رمادى ومفيش الوان تانيه

حاسه انى اشبه الصوره اللى فوق دى
انا موجوده من بره بس انما من جوه فاضيه ومافياش حاجه

من شهرين لما بدأت 2009 اخدت عهد على نفسى مش اسيب نفسى للحزن فعلا صدقت لانى الاول كنت بسيب حاجات صغيره تأزم حياتى وكنت مستسلمه للحزن ده

انما دلوقت لأ
غصب عنى بتحصل حاجات كبيره

حتى الدراسه مش عارفه اركز وابداها
رغم انى مقضياها سفريات من اكتوبر للقاهره للعاشر لمعرفش فين وكل يوم فى شركه شكل وبعرف ناس غير الناس وبشوف اماكن جديده
وانا اساسا السفر وتغيير الوشوش بيغيروا مودى

بس بقى تغيير مؤقت بحسه ساعتها وبحاول اسعد نفسى لكن لسه اللون الرمادى مسيطر عليا

هحاول اخرج منه
وهحاول احكى واكتب الحاجات الكتير اللى حصلتلى الفتره اللى فاتت وماتكلمتش عنها

بس نفسى ربنا يغير اللون الرمادى عنى

انا ونفسى

جايه اكتب علشان حاسه انى عايزه اكتب
مع انى مش عارفه هكتب ايه بس اهو هكتب وخلاص

مش عارفه ليه مش رحت اكتب فى اجندتى
بس من يوم مااخدنى التعب منها فتره طويله وانا مش قادره ارجعلها
مع انى كنت محتاجالها اوى ايام ماكنت فى السرير ومش بتساعدنى صحتى على الكلام لكن كمان ايدى مكانتش قادره تمسكها

حاسه انى كنت خايفه اقولها اللى عايزة افضفض بيه

مع انها هى اللى بتتحملنى وهى اللى بقول فيها كل حاجه

هويت الكلام معاها

حاسه انى عايزه اقولها على حاجات كنت عايزه اعملها وماقدرتش
وحاجات كنت عايزاها تحصل ومش حصلت
وحاجات حصلت مكنتش عايزاها تحصل

وحاجات كاسره قلبى وتاعبانى

محتاجالها اجندتى بس خايفه اقرب منها
حاسه انى لو مسكتها هعيط وبس ومش هكتب ولا كلمه

محتاجه دلوقت حضن احس انه دافى
حضن بحبه مش احكيله اى حاجه
اترمى فيه وبس واعيط
واسرح جوه نفسى فى اللى بيظلمونى وفى ظلمى انا لنفسى

مش عارفه لحد امتى هفضل اقول تعبانه
بجد تعبانه

تعبانه

مش عندى غير كلمه آه

آه عاليه اوى بتكسر جوايا

بتموتنى كل يوم

نفسى اخرجها ومش قادره

دموعى ومرضى الفتره اللى فاتت خرجوا كتير

عمرى ما مريت بأزمه مرضيه زى اللى مريت بيها

وعمرى مابكيت زى مابكيت الفتره اللى فاتت

وعمر ال آآآه ماتخنقت جوايا زى الفتره اللى فاتت

نفسى اقولها توصل السما

بس مش عارفه اقولها فين؟

ولا مين مفروض يسمعها؟

ولا مين مفروض يحسها؟

بس هى ال آآه المحبوسه

تعباااانه

بجد تعبانه