والنعمه ورحمة أبويا ده حرام
هو ايه اصله ده؟
هو انا كل ما اقول قربت اخلص الماده وهنط خلاص عاللى بعدها واعمل انجاز الاقى حاجه بتطلعلى ناقصه تقولى ذاكرينى انا فى المنهج
يوه انا قربت اطق
قال والدكتور بسلامته زعل اوى منى وانا قاعده معاه فى المكتب وبقوله ايه يادكتور النظام البتاع ده كبير اوى وانا شايفه انه مالوش لزوم مادام عملنا فيه مشروع يقوم يقولى بتاع؟!!!!!!!!
اه يادكتور بتاع ايه كبير عليها يعنى؟
يقولى انتى غاويه تحرفى دمى؟
قلتله يادوك مش عارفه هويتها ايه ولا عنوانها ايه اقول عليها ايه ؟ اللى ماتتسماش يعنى؟ :)
وحسيت ان الراجل لولا انى مصاحباه وبيحبنى حبتين كان حدفنى بره المكتب
وجاى بكل فخر يقول انتى زعلانه ليه ده انا حتى مش اديت لكوا غير 3 محاضرات بس بعد الميد تيرم
اسم الله على مقامه مايعرفش ان فى واحده بس فيهم واقفه علينا ب 90 صفحه فى المرجع ياريته كمان كتاب :((
طب اعمل ايه انا دلوقت يعنى؟
فاضل الماده الكبيره والامتحان يوم الحد
اعمل اييييييييييييه؟!!!!!!!!!
هو اى نعم انا مش حارمه نفسى من حاجه وبسمع حاول تفتكرنى بتاعه حليم ومش عارفه هى معششه فى نافوخى ليه اليومين دول وبقعد اهيس وانا بسمعها بس برضه فى حاجه ناقصه
فى حاجه ناقصه
فى حاجه ناقصه
فى حاجه ناقصه
اممممممممممممممم
ايووووووووون ........هى النوم
انا احلى حاجه يعنى
انا حاسه انى مش بنام كتير هما حوالى 7 ساعات كل يوم واوقات 8 وده حرام
انا انام وخلاص واللى يعمله ربنا يكون
المشكله ان ال 4 ايام اللى البت عصير قصدى عبير قعدتهم معايا فرقوا معايا ومعاها وكنا بنذاكر سوا ومقسمين الليله السوده دى انما دلوقت هى روحت
وانا مش لاقيه حد يشجعنى
واللى بينرفزنى بجد بقى انى ابقى سهرانه بقرد لوحدى نص الليل ولحد الفجر فى السقيع والتلج والبيت كله نايم
قال وايه امبارح قاعده بفرغ همى فى ماما اللى صعبان عليها حالى
ولما اشتكيت لها زهقت منى وسابتلى الاوضه وبقولها امتى بقى يجى عليا شهر واحد ده وانا نايمه تحت البطانيه-عماله ابوس فى البطانيه-
تقوم تقولى ذاكرى انتى وانتى تخلصى ...طب هو انا ناقصه غم
ععععععععع مش بقول ده ظلم
لا
الموضوع محتاج وقفه
ياخدوا كل حاجه ويسيبونى اناااااااااااااااااااااااااااام
ملحوظه ظوغنططه:
المعتقل اللى هو عنوان التهييس هو اوضتى وده الاسم اللى اطلقته عليها ماما من كتر ماانا بغطس فيها واغيب عن العالم الخارجى حتى الشباك دايما مقفول.
وثانيا اوعى حد يفتكرنى البت الرايقه اللى مرزوعه بتذاكر فى الصوره دى كأنها حابه الحكايه اوى دى والنعمه شكلها بترسم مش بتذاكر.
انا انفع الصورة اللى مطرشأه دى 
انا هروح انتحر بقى يالا باااااااى
ابقوا ازعلوا عليا ياعيال مش عايزة قلة اصل
هناك 4 تعليقات:
ياااااااااربي ده دكتور رخم زحلان من بتاع قوليله عندي واحده كل حياتها بتاعات
ياااااااارب تخلثي من المعتقل
هانت يا غريبه
كل الناس اتعذبت فى الكليه ولما اتخرجت فوجئت ان الكليه كانت دلع
والعذاب الحقيقى بعد التخرج كمان تقديم راسله الماجستير
والدرسات والتمهيدى
قرف ما بعده قرف
انتى فى نعمه احمدى ربنا عليها وكلى عيش
بتنامى سبع سعات ومش عجبك
انتى بتهرجى؟؟؟؟؟
سبع سعات دول حلم ناس كتير بتنام اربع وخمس سعات
اما بالنسبه للدكتور بتاعك
متنقوا كلامكوا ايه بتاع دى
اسمها (الزفت الماده) او (البعيده)
لكن لفظ بتاع دى ميصحش كمان الراجل فى سن خطر وبيلقط الكلام ده وممكن يردده
اما بالنسبه للمعتقل ده بقى هو العذاب بعينه الحبسه صعبه جداً
ربنا يفك سجنك
بالنسبه لبيرو الى راحت بيتهم انتى روحى اخطبيها وهاتيها تعيش معاكى فى بيتكوا
اما بالنسبه لمامتك فهى تستاهل اكيد كانت بتعذب مامتها وهى صغيره وربنا بعتك تخلصى منها الى عملته زمان ربنا يصبرها بقى
مع خالص تمنياتى بالنجاح والتوفيق
ودعائى بتسهيل كل ماهو صعب انه على الله يسير
تحياتى
كيارا
:)
ياشيخه؟
ده لو شاف كلامك هيحب نفسه
ده انتى دلعتيه والله
يارب يستجيب وافتكريبنى بدعوه فى صلاتك :)
momken
:))
انت مجرم على فكره
تعليقاتك بتفطس من الضحك وانت بتتكلم عادى جدا ولا كانك بتقول حاجه
طب بذمتك اخطبها ازاى بتهرج انت عايز تشكك الناس فيا؟
منورنى :)
إرسال تعليق