أول ايام 2009

مبدأيا كده الصورة دى مالهاش أى علاقه بالموضوع غير انها عاجبانى من أول ماشفتها وحاباها أوى لبرائتها فرحت حاطاها :)

أول أيام سنه جديده
قبل ماانام فضلت أقول يارب يسر الاحوال واقوم الصبح رايقه علشان أبدأ يوم جميل
وقلت من ضمن الغلاسه هصحى الصبح لو لقيت وشى رايق يبقى اليوم هيبقى تمام ولو مكنش لا قدر الله يبقى ربنا يستر .

الحمد لله صحيت الصبح وشكلى عجبنى فى المراية :)
خصوصا إنى فتحت عنيا على صوت مسج جميله من حد أجمل بيقول كل سنه وانتى طيبه
قلت اشطه اليوم هيبقى تمام

لبست وشربت القهوة اللى هتودينى فى داهيه ان شاء الله وخرجت علشان اقابل العيال اللى مفروض انهم هيظبطوا الماده اللى مش عارفين نذاكرها هى والاتنين اخواتها التانيين والمفروض ان مابقاش فى وقت كل واحد يلم كل المواد لوحده.

خرجت من البيت وانا حاسه انى مبسوطه ومن غير سبب غير انى عزمت انى ابدأ السنه بابتسامه.

مكنتش لابسه لبس جديد ولا حتى كلاسيك لكنى كنت رغم انى لابسه سبور بس كنت حاسه ان شكلى حلو.

ولاكتر من موقف ظريف مكنتش برد غير ببسمه حتى لو من جوايا وكنت حاسه ان الناس كلها بتبص عليا رغم ان ده مش حقيقى بس منطلقه كده :)

ركبت العربيه وكان جمبى راجل عجوز بس شكله طيوب اوى وشايل حفيده على رجله
حفيده كان زى القمر وكان عمره كام شهر.

انا مكنتش واخده بالى منه فى الاول بس لفت نظرى انه كان عمال يتلفت ويبصلى -البيبى الصغير مش جدو-
وانا كنت هموت والاعبه لانه أمور اوى لكن كنت مكسوفه من جده
وفى الاخر ماقدرتش اقاوم خصوصا ان الولد كان لابس ايس كاب اصفر وهو ابيض وامور اوى وسأِلت جده عن اسمه قالى احمد

المهم كمل البوم من غير شرح وضاع هدر ماطلعتش غير بشويه ورق وقررنا انا وعبير ننزل نشتريلها برالينه ونعمل القيزا كارد اللى بتتحايل عليا بقالها شهر تعمله .

فضلنا واخدينها تمشيه من عند المستشفى عالبحر لحد ماوصلنا المحافظه وهناك ووانا بتكلم فى الموبايل مره واحده عبير اتفاجئت بأنى الفايل وقع منى هو والموبايل عالارض وانا لحقت نفسى بإنى اترميت على التنده اللى جمبى ومش قادره اخد نفسى من الم فى جمبى وبطنى.

قفلت هى المكالمه مكانى وساندتنى لحد ما ارتحت وقمنا كملنا المشى ومعرفش لحد دلوقت ده كان من ايه؟
ودى الحاجه الوحيده الوحشه اللى حصلت.

ومن أغرب المواقف الولد العجيب اللى كان فى المحل وحركاته وطريقه كلامه اللى بتقول انه عايز ينام تقريبا بس اكتشفنا فى الاخر انه ده الطبيعى بتاعه .
الولد كان بيفصل فى النص وبيتنح وأنا ياعينى ببقى غلبانه اوى ومش بعرف اتصرف ولان عبير عارفه كده رحت استخبيت فيها وهى فضلت تتريق على الولد وتقول عليه مش طبيعى علشان يتهد ويفهم انها بتشتمه وده ولا هنا.

كمل اليوم وكان اخره تهييس واول ماسبت عبير قابلت بالصدفه واحده صحبتى فى صيدله من البلد وروحنا سوا وفضلت اتريق عليها لانها قاعده تطلب منى انى اجيبلها أغانى عجيبه على الايبود وانا مش بسمع الاغانى دى ولا الاستايل ده.

ولحد ماوصلت البيت الحاجه اللى كانت قرفانى هى التعب وغير كده اليوم كان لذيذ .

ده مع الوضع فى الاعتبار انى مش راضيه اكتئب علشان عندى اكبر 3 مواد معرفش عن مناهجهم حاجه وفاضل اسبوع على امتحانات الفاينال :((

يارب تكمل السنه على كده يارب