واخيرا المشروع

ياااااااااااااه
كانت غمه واتزاحت بجد
اخييييييرا ناقشنا المشروع يوم الحد 28/6
كان نفسى اجى يومها اكتب تقرير عن اليوم بكل تفاصيله واد ايه كان يوم جميل
بس للاسف نمت من الساعه 6.30 العصر ماصحيتش غير الفجر صليت ونمت تانى D:

اليوم بدأ بمغص معتاد فى مثل هذه المواقف وبالطبع اضطريت اعصر على نفسى لمونه واحط مشبك غسيل فى مناخيرى علشان اقدر اشرب نص مج نعناع مغلى وقد كان
وخرجت من البيت وانا حاسه بمزيج من الخوف والاطمئنان اللى معرفش ايه مصدره لحد دلوقت !!!!

وبدأ اليوم بعبارات مدح من د/عادل لينا وشكر لمجهودنا الجبار اللى خرج المشروع كامل فى 20 يوم بس وبصوره على حد قوله مشرفه
فرحت اوى لما سألته حضرتك راضى عن المشروع قالى "جداااااا"
بس كان جوايا قلق من الحلفاانات الكتيره اللى حالفها لايسقطنا فى المشروع

فرحت اوى لما انا اللى بدأت المناقشه ولاول مره بكون ثابته وواثقه من نفسى بالشكل ده
ولما خلصت عبير ضحكتلى وقالتلى برافو كنتى هايله:)

وانتهت المناقشه بعد نص ساعه فرحت اوى لما ياسمين قالتلى انى كنت احسن حد ناقش فيهم

ياااااااااااه الحمد لله بجد
اى نعم المحصله كانت واحده وكل الجروب جاب امتياز

بس اتبسطت اوى من كلام د/محمد عبدالفتاح رئيس اللجنه معايا بعد المناقشه واهداؤه ليا النسخه بتاعته كمان:)

مش عارفه ليه كنت حاسه بانطلاقه مع انها قالبه معايا بعيا من يومها ومش بقدر اتحرك

اكتر حاجه استغربتها كانت كلمه رغده ليا"هو انتى ناويه ماتشوفنيش تانى؟؟"
بعد ماطلبت منها نتصور سوا وكان ردى اللى كله ذهول"وايه دخل ارتباطى معاكى بصور بكونى هشوفك تانى او ماشوفكيش!!!!"


حسيت اخر النهار انى مش فاكره اى حاجه وحشه لاى حد فى الدفعه
وفى نفس اللحظه حاسه انى مش عايزة اعرف معظمهم تانى
هما شويه صغيرين يتعدوا على الصوابع اللى حاسه انى عايزة علاقتى بيهم تستمر

كان نفسى بعد الصور الجماعيه اللى اخدناها مع الدكاتره اقف مع كل حد فى القسم كنت بتعامل معاه واقوله اسفه لو كنت فى يوم زعلتك فى حاجه اكيد كان من غير مااقصد بس معرفش ليه الناس اتفركشت وكله لما عرفنا النتيجه اختفى ومااتكلمتش مع حد ويادوبك سلامات سريعه وخلاص

دلوقت عندى لكل حد قربت منه فى القسم كلمه

اصدقاء جروب السنه كلها

رفاء: خسارتك فى جلد الحيه..نفسى تبطلى نفاق وغرور
أحمد: ماعرفتش اقذر منك فى حياتى..ببساطه مش انت اللى يتقال عليه راجل
أما عبير: يظهر فى حاجه روحانيه بينى وبينك عايزة تحافظ عليا وعليكى لكن واضح ان حتى دى مش فارقه...نفسى تعرفى تقدرينى

باقى الدفعه

رغده: كنتى هتبقى احسن بكتيييييييير لو تناسيتى شويه انانيه ترتيبك عالدفعه
الاء: ببراعه اثبتيلى انى ممكن يتضحك عليا...بس هتوصلى بسرعه
الهام: مشفتش زيك حد يكدب الكدبه ويصدقها...الله يباركلك انتى واسلام
اسلام خطيب الهام: مش كل الناس ممكن يبقوا زى البقالين ...ممكن تحاول تدور على صاحب بجد من غير مصلحه
ايمان ممدوح: عاذراكى فى اللى وصلتيله .طيبتك مع براعه الهام يعملوا اكتر من كده
اميره العزب : حقيقى تستاهلى كل خير بس لو تهتمى شويه :)

شريف: انت الوحيد اللى بقول عليك تعرفنى لانك زيى ...يارب مااتصدمش فيك ابدا يارب
احمد عرفه: كنت بقول عليك اجدع واد شفته فى حياتى ...خساره معرفتك بنورهان
محمود مسلم: حقيقى انت كويس بس لو تبطل تسمع كلام من غير ماتعقله!!
نورهان: مش حاسه غير انى عايزة اقول فيكى حسبى الله ونعم الوكيل...ربنا يهديكى لنفسك
هبه سامى: جواكى نضيف ليه مش بتحاولى تبقى كويسه؟

محمد عبد العظيم: انت جدع اوى بس لو تبطل العرق الصعيدى ده؟!!! :)


ده انطباعى بعد 4 سنين معاملات مع الشله اللى فوق دى بس
كان نفسى اجيب الصورالجماعيه لكن العيال مش نزلوها عالفيس بوك للاسف :((

يارب يعدى النتيجه كمان على خير يارب

baaaack

واخيرا عوده للبيت بعد غياب اسبوعين بره

احساس حلو اوى الاستقبال اللى البيت استقبلنى بيه مع ان دى مش اول مره اغيب بره لكن المده المرادى كانت اكبر من اى وقت فات

المرادى رجوعى كان مع مناسبه نجاح اخويا
واحلى حاجه انى رجعت لقيت نينا عرفت انى جايه فجت تستنانى هنا من كتر ماانا واحشاها :)

ومع ان الرجوع مكنش متخططله خالص على امبارح ومكنش فى نيتى بس ارداه ربنا بقى خلت الظروف تنزلنى
فرحت اوى بطريقه سلام محمد عليا وبالليل كمان لما رونى رجع حضنى حضن جميل اوى بجد
حسسنى انه كان مفتقدنى فى البيت وقالى كتير اوى انى وحشته

عوضونى عن شويه الغربه اللى حسيت بيهم بره الاسبوعين دول

الفتره اللى فاتت كانت سيئه جدا جدا جدا
مشاكلى مع عبير بتخنقنى خصوصا انها دايما بتقولى بكره خناقاتك لانك دايما بتطلعينى غلطانه

ومع ان عبير بتبقى متأكده انها فعلا فى كل الخناقات بتبقى غلطانه لانها عارفانى بقدر اكظم غيظى اوى واتحكم فى انفعالاتى علشان مش اخسرها بيخلينى اخرج عن شعورى اوقات كتير اوى لما ابعدعنها علشان افرغ ضيقى منها

ولانها دايما دايما مابتحبش تعترف بغلطها او تعتذر انا بتعب جدا لانها مش بتقدرنى

واكتر حاجه بتزعلنى انى دايما اقولها انا مش ببقى عايزاكى تعتذرى لما تزعلينى لكن ببقى مستنيه منك ولو نظره حزن انك زعلتى حد بيحبك زيى علشان انا عارفه انها مش بتحب تعتذر انا بتخنق اوى

ونفسى بتصعب عليا اوى لما الاقيها بتتجاهل زعلى منها وانعزالى لوحدى لما اكون زعلانه منها وهى عارفه كده والاقيها جايه تهزر وتضحك عادى كان مفيش حاجه حصلت وكأنها ماغلطتش ولا زعلتنى

واللى يتعبنى اكتر واكتر انى ماحبش اشتكيها لحد يعرفنى ويعرفها علشان مفيش حد يعرف اللى بينى وبينها ودايما اقول اللى بينى وبينها احنا بس اللى نقدر نصفيه ومع كده هى عادى ممكن تحكى لاصحابها مشاكلنا وبقدرتها العجيبه على تجاهل المواقف اللى بتبقى هى غلطانه فيها دايما اكون انا الغلطانه والوحشه

ولو حصل صدفه وعرفت انها حكت لحد لما يجى يلومنى وجيت انا كمان بينت الموقف الاقى الكل يغلطوها هى وده اللى بيضايقها
انى انا الوحيده اللى بتطلع غلطانه معاه لانها زى ماهى بتقول بتصرف بملائكيه صعب تبقى موجوده دلوقت

انا مش غلط
انا عارفه كده لكن صعبانه عليا نفسى منها
ليه تطلعنى وحشه
ليه تحكى لحد مشاكلنا مع انى بحرج اى حد يدخل بينى وبينها

وليه مش بتاخد بكلامى لما بقولها ماتتصرفش وحش مع اصحاب الشقه لانهم مش غلطانين فى حاجه وانها مفروض تحسن طريقتها فى الكلام معاهم علشان ماتسمحش لحد انه يقول عليها كلمه وحشه حتى ولو بينه وبين نفسه

وليه بتسيبنى اسمع كلام وحش بيتقال على اسلوبها فى الكلام مع انى قايلالها انى مابحبش اسمع حد يغلط فيها خصوصا انى بدافع وانا عارفه انى مش ببقى على حق

ليه لما قلتلها الف مره حسنى طريقه كلامك معايا انتى عارفه انى بزعل وحساسه تجاهلت كلامى

وليه لما قلتلها حاسه انك متغيره معايا وبتبقى كويسه طول ماانتى بتتكلمى مع محمد قريبك واول ماتيجى عندى تبقى متنشنه قالتلى طظ فى احساسك

ليه بتجرحنى وبتستهزئ بيا

ليه لما خرجت لوحدى بالليل اتمشى وهى عارفه انى بعيط مافكرتش تمشى ورايا وتحاول تخفف عنى وهى عارفه انى باستريح لما اتكلم معاها

وليه لما رجعت لقيتها بتضحك عادى وشفت نظرات الحزن فى عيون اسماء وامل علشانى وهى اكتر حد كان بضحك وانها مش مهتمه بحزنى اللى هى سبب فيه

وليه دلوقت هى اللى زعلانه وواخده جمب منى
؟؟؟؟؟؟؟؟؟؟؟؟؟؟

كان لازم تكون عندى الشجاعه علشان اقولها انى استعجلت بالنزول للبيت علشان اهرب منها قبل ماتصرفاتها معايا تخليها تخسرنى واخسرها مش علشان ماما اللى بتتحايل عليا انزل

مكنش لازم اكدب واقولها فلوسى خلصت علشان انزل

كان لازم اقولها انى بهرب قبل مانخسر بعض
يمكن لما تحس انها ممكن تخسرنى تراعى مشاعرى شويه

نفسى الاقى اجابه للاسئله دى
هى ليه بتعمل كده؟

معقول تكون هى زى ناس كتير اوى مابيعرفوش يقدروا اللى بيحبوهم بجد؟
معقول تكون هى كماله حكايه صداقاتى الفاشله اللى مابتدومش ابدا؟

هى وصلتنى معاها لمرحله انى قلتلها نفسى ابطل اخاف عليكى اوى كده ومش عارفه
قلتها نفسى ومش قادره بس لازم اقدر
لسبب واحد هو ان خناقتنا سوا كلها بتبقى بسبب خوفى عليها

خساره ياعبير
خساره

اممممممممم معرفش

جايه اكتب بس لان البلوج وحشتنى اوى

حاسه انى بقالى 100 سنه ماكتبتش مش لانى بس ماكتبتش فيها لكن لانى كمان لاول مره بقعد اسبوع كامل من غير مااشوفها

سكنى بره البيت الفتره دى بالنسبالى غربه اوى مع انى الى حد كبير مرتاحه نفسيا الحمد لله

السكن مع عبير وان كان لايخلو من شويه شد خفيف بسبب مشاكل خارجه عن ارادتى وارادتها مابيوصلش ابدا لمرحله الزعل او الخصام ميزة كبيره حتى لو البعد عن البيت تعب

لاول مره بحس بيتنا بيوحشنى اوى كده

نفسى دلوقت اشوف ماما خالص

زعلانه اوى لانها كل ماتكلمنى تقولى هتنزلى امتى

هى اه مش بتقولى وحشتينى وانا اللى دايما اقولها ليها بس انا عارفه انى واحشاها زى ماهى واحشانى هى ومحمد اخويا مقصوف الرقبه

وحشنى النوم على سريرى

وحشتنى مرايتى ومكتبى وجهازى

وحشتنى اوضتى كلها

وحشنى اكل ماما :)

اه والله اصل اكل بره حتى لو اكلات بحبها بس برضو وحش جمب اكل ماما

مش ناسيه طعم محشى ورق العنب اللى اكلتهولى وانا عندها :)

وحشنى بيتنا بكل حاجه فيه حتى البلكونه اللى كنت بخرج اقعد فيها ساعه المغربيه

نفسى بقى المشروع يخلص

انا زعلانه اوى علشان اخويا كان عيان ومقدرتش اشوفه

انا كنت بقول على نفسى جامده واقدر اتحمل البعد عن البيت طلعت عيله اوى :(

يمكن مش مهون البعد عليا الا سكنى مع عبير لوحدنا بس برضو

يارب بقى اخلص يارب

انا تعبت

يارب ماتضيع تعبى يارب

كلام والسلام

فترة عجيبة مشحونة بالضغوط النفسيه المتوقعه لكن مش بالشكل ده

اخيرا ناقشنا مشروع six sigma اللى طلع عيننا بقالنا ترم بحاله
الحمد لله الدكتور المشرف اعترف اننا فاهمين كويس اوى ودماغنا حلوه وعاملين دراسه كويسه

وده خلانا نحس بالرضا وننسى البهدله اللى اتبهدلناها فى الشارع ليله المشروع وسهرنا بره البيت لحد الساعه 2 بالليل بلا مأوى كده زى اطفال الشوارع وياريت فى بلد اى حد فينا انما فى الزقازيق يعنى الاحتمال كان كبير جدا اننا نبات فى الشارع

وطبعا كان لازم بما اننا خرجنا مرتاحين نفسيا لكن تعبانين جسديا ان اليوم مايعديش
هو ممكن الايام تعدى طول مافى رفاء؟!!!!!!!!!!

النهارده وبعد الموقفين الاسخف من بعض بتوعها امبارح واللى عديتهم بمزاجى لانى اعتبرتهم هزار اكتشفت انها بتعك فى الكلام من ورايا ودى مش جديده عليها فقررت فجأه وبعد احتدادى على عبير لانها سكتت قدام رفاء ومش نصرتنى رغم انها عارفه انى صح واكتشفت انها مكانتش تعرف حاجه قررت انى بدال مااطلع غلى من رفاء فيها انى اواجه رفاء المواجهه اللى بهرب منها بقالى 8 شهور

لاول مره بقالى كتييييييييييييييير اوى بشوف نفسى فى اقصى مراحل غضبى
بقالى كتييييييييير ماسمعتش صوتى عالى كده
بقالى كتييييييييير ماواجهتش حد بالصراحه دى
بقالى كتيييييييير معرفتش اكظم غيظى زى النهارده
بقالى كتيييييييير ماتظاهرتش بالقوه اللى تظاهرت بيها النهارده قدام رفاء
بقالى كتيييييييير ماعجزتش حد قدامى بالشكل ده واستقويت عليه اوى كده
!!!!!!!!!!!!

حاسه انى راتحت نفسيا كتير لما خرجت فيها تعبى ده لكن برضو مش حاسه انى مرتاحه
علشان زعلانه من نفسى لانى وصلت نفسى للمرحله دى فى الغضب

انا اه مش ظلمتها ولا اتجنيت عليها فى حاجه ولا حتى فى عز غضبى غلطت فيها بكلمه واحده لكن برضو ماتعودتش من نفسى انى استقوى على حد

بس برجع اقول لنفسى هى كانت بدأت تستضعفنى وتحس انى مش قادره اعملها حاجه مش انى بسكت وبعدى علشان مش عايزة اعمل مشاكل او ازعلها منى وكل اللى بينى وبينها شهر ويعدى وتغور هى فى ستين الف داهيه

لكن لما ماما صحيت من النوم مفزوعه على صوت زعيقى وطلبت منى اقفل السكه ولامتنى كتير لما قفلت
حكيتلها وزعلت واتنكدت وقالتلى عدى اللى بينك وبينها الفتره اللى جايه والناس كلها مش زى بعضها

لسه برضو الضغط من دكتور عادل زفت شغال وانا حاسه انى بنهار قدام ايمانه اللى بيقسمها انه هيسقطنا فى المشروع

ربنا بقى يعدى التلات اسابيع الجايين دول على خير
نفسى اناااااااااااااااااااام وانا بالى مرتاح مش نوم ديابه مغمضه عين ومفتحه عين :(