حالة من التهييس عجيبة الشكل والاطوار دخلنا فيها انا وعبير امبارح بعد الامتحان بسبب الامتحان الاسوأ من اى توقع توقعناه انا وهى
ومع انى توقعت ان انا وعبير نهيس زى كل مره قبل الامتحان من كتر الضغط خصوصا انها ايام الامتحانات دى غالبا بتبات معايا ومابتقعدش فى بيتهم مع ان المسافه بين بلدى وبلدها شنيعه
بس تهييس المرادى كان غييييييير
يمكن لان اكتر كلمه علقنا عليها هى كلمة الدكتور الحقير بتاعنا لما قال الامتحان ياجماعه سهل وبسيط ومن المحاضرات as it is
مع ان البعيد اصلا مش دخلنا غير 3 محاضرات بعينهم فى الترم كله وكل واحد كان داخل مذاكر المنهج على مزاجه
!!!!!!!!!!!!!!!!!!!!!!!!!!!!!!!!!!!!!!!!
روح الهى ينتقم منك شر انتقام ياسيد ياكعب الغزال دايما اقول هدعى عليك اقول ايه وانت فيك كل العبر بس بقالى اربع سنين مش بدعى عليه غير بحسبى الله
غالبا الحالة دى لان التهييس كان للتلات مواد مع بعض
بتاعت امبارح وبتاعت يوم الاحد وبتاعت يوم الاربع اللى قبله
وكنا كل مره نقول معلش يلا تتعوض قى المره الجايه وكل مره نلاقى الامتحان اسوأ من المره اللى قبله
وده يمكن كان السبب الرئيسى فى انى رغم كل الضغط اللى كان جوايا المره اللى فاتت الا انى ماقدرتش اقرب من البلوج واكتب فيها اى حاجه خصوصا انى عندى حاله عداء شديده بينى وبين الكى بورد والكمبيوتر على بعضه اليومين دول وكمان مفيش وقت
اخيرا قدرت اتغلب على الحاله دى والجأ للبلوج النهارده اشتكيلها مر الغلب اللى احنا فيه
يمكن ده لانى فرحت شويه لما عرفت ان عبير قررت تهج من بيتهم وتجيلى تقعد معايا لحد يوم الامتحان مع ان الماده اساسا مش تستدعى ده؟!!
