أفضل ولا أتغير؟!

يمكن بنقابل فى حياتنا ناس كتير

لكن مش كتير منهم اللى ممكن نحس انهم يستاهلوا حاجات كتيرة حلوة جوانا

اخلاص او حب او عطف أو..... أو....أو...

لما بنقابل الناس دول بندى من غير مانفكر ومش بنفرق ولا بنفكر احنا ادينا قد ايه لانهم ممكن ياخدوا مننا وغصب عننا وبطيب خاطر مننا لان ساعتها قلوبنا اللى بتديهم من غير ماترجع لعقولنا

لما بنحس فى وقت ان اللى بنديلهم من قلوبنا وعقولنا وحياتنا دول مقدرين..فاهمين..حاسين

بندى اكتر ومابنفكرش

لكن ممكن نصطدم بأكبر المصايب

وهو انهم ممكن يفتكروا ده ضعف مننا

أو اننا خلاص مانقدرش نعيش من غير وجودهم

وتبقى مكانتهم فى قلوبنا هى السكينه اللى بيضربوا قلوبنا بيها علشان عارفين اننا هنتحمل مهما حصل لاننا بنحبهم

وساعتها بنموت والصدمه ممكن تضيع حاجات كتير حلوة جوانا

وبنحتار

نفضل ندى ونقول مش قادرين مانديش لانهم خلاص بقوا جزء من كياننا

ولا نبطل ندى ونعلم نفسنا تقسى زى مابيقدروا يقسوا علينا ؟؟!!

مش عارفه:(

متناقضات

حيرة
قلق
خوف
توتر
حزن
وقليل من البسمات

خليط جبار من الشاعر اللى بتضرب فى بعضها جوايا
احساس اكتر من بشع تجمع الاحاسيس دى مع بعض فى وقت واحد
احساس انى اكون صادقه وكدابه مع بعض
هاديه ومتوتره مع بعض
حزينه ومبسوطه مع بعض

مفيش اصعب من المتناقضات لما تتجمع كلها فى وعاء واحد
الوعاء دلوقت فى قمة توهانه وتعبه

الوعاء خلاص تعب
يعمل ايه علشان يرتاح؟!

يــــــارب
لا ملجأ منك الا اليك

اسمع كلامى

اسمع كلامى وصدقه
انت اللى روحى بتعشقه
كان حلم نفسى احققه انى ابقى ليك
قربنى منك ضمنى
قد اما احبك حبنى
مين غيرك انت يهمنى ده انا روحى فيك

ملهوفه عليك ومسلمه
تقدر تقول مستسلمه
حاسه انى طايره فى السما
واخدنى الشوق
متحيره ومتغيره وكأنى لسه صغيره
لو بحلم انا م الحلم ده مش عايزة افوق

لحظه حنان انا عشتها
لحظه ماشوفتك وقتها
وباعلى صوتى انا قلتها هفضل معاك
جمبك طريقى هكمله
لولسه عمرى فى اوله
المستحيل انا هعمله علشان هواك

ملهوفه عليك ومسلمه
تقدر تقول مستسلمه
حاسه انى طايره فى السما
واخدنى الشوق
متحيره ومتغيره وكأنى لسه صغيره
لو بحلم انا م الحلم ده مش عايزة افوق

جنـــات

اسمع كلامى

الاغنيه اكتر من رأئعه واتعلقت بيها قدرت تخطف قلبى من اول مره سمعتها فيها ودى نادرا لما بتحصل معايا مع اغنيه

ممكن اسمع الاغنيه 3 او 4 مرات الاول وبعدين ابتدى اخد بالى من انى حاساها

لكن دى انا حاساها اوى

حاباها اوى

وعايشاها اوى اوى اوى

بجد تحفه :)

مركب ورق فى البحر

مركب ورق في البحر

والبحر قلبه كبير كبير

مركب ورق قلبى

بتعاند المجادير

موج ياخدها لفووق

وموج يطوحها

شطوط بتحضنها

وشطوط بتجرحها

والبحر بجلاله ... كتير مبيسعهاش

مركب ورق قلبى

أوان فرحها مجاش

ممتلكاتى الصغيره...بحبكوا :)

بقالى كتير مش عارفه مش قادره اكتب اى حاجه فى اى حاجه ليه
حتى اللى هعمله النهارده عايزةاعمله بقالى فتره ومكسله
ولو قلت ضغط المشاريع اللى بنسلمها كل اسبوع وامتحانات الميد تيرم والفيلم ده ابقى بكدب لانى بعرف اهرب منهم كويس
بس بحمد ربنا ان رغم ان الفتره اللى فاتت حصلتلى مشاكل كتير الا انى عايشه حاله من السلام النفسى بحمد ربنا عليها

البوست ده بقى انا عاملاه نوع من الولاء للحاجات اللى بحبها بجد من ممتلكاتى الصغيره
واللى جابلى الفكره دى هو الموبايل بتاعى اللى بجد بعشقه بس للاسف طلعت عينه 4 سنين وماسبتوش ولا غيرته الا لما باظ منى مع انه يعتبر مش امكانيات بالنسبه للموبايلات اللى موجوده وطلعت فى الاربع سنين دول

موبايلى اللذيذ

الموبايل ده فضل معايا الاربع سنين بنفس الباك جراوند الوردتين البيض والخلفيه الاخضر الهادى اوى اللى كانت بتريح عنيا ونفس النغمه اغنيه معقول للجميل فضل شاكر وبدون مااكل ولا امل منه وللاسف دلوقت بتعامل مع موبايل مش طايقاه من بعده وحاطه ده قدامى وعماله اقول فينك ياحبيبى :) مع ان مصيره بقى حقيبة الذكريات

My Nice Ipod

الحاجة التانيه هى الايبود الجميل بتاعى اللى حقيقى قلبى ارتبط بيه من ساعه ماجبته بقاله سنه ونص واللى كان جايلى هديه نجاحى فى تانيه جامعه بتقدير امتياز واللى كنت اول مره اجيبه :)

مش عارفه ليه بحس انى مش بحبه يفارق شنطتى ولو مره اخويا اخده ينقل عليه حاجات ببقى قلقانه لحد مايرجعلى بيه ولو وقع منى ببقى حاسه ان قلبى هيقع وراه.
بس مش عارفه ليه هوشكله وحش فى الصوره اللى جبتها من النت مع انه فى الحقيقه امور اوى وعسل :)
بجد بحبه اوى

مجى حبيبى

الحاجه التالتة هى المج بتاعى اللى عمره معايا كان قصير أوى اوى اللى اتكسر أول يوم جبته فيه لما محمد اخويا قالى انه عاجبه قلتله مش هتاخده برضو والحمد لله اول ما جيت اصب فيه النسكافيه فرقع :)
بس برضو حاسه انى قلبى اتعلق بيه رحت عملته للاقلام بتاعتى على المكتب ومارضيتش استغنى عنه مع انه مش عشره معايا ولا حاجه بس حبيته من أول مادخل بيتنا :)


قلمى الاحمر

الحاجه الرابعه هى القلم الروترينج الرصاص الاحمر بتاعى
اللى ضاع منى فى تالته ثانوى وجبت بعده تلات اقلام حمرا لانى كنت بحبه اوى وكنت بجيب دول علشان احس انه مش ضاع منى وللاسف كلهم ضاعوا ودلوقت خفت على اللى جبته اخر حاجه يضيع منى واخرج من الجامعه بدون ذكرى لانى بحب الذكريات دى فاحتفظت بيه وجبت غيره علشان استخدمه

lovely flower

وعلى ذكر الحاجات اللى بحبها مع إنى مش بمتلكها هقول الورد الاصفر اللى بيقدر يخطف عينى فين ماكان ومره اتهزأت وانا خارجه من الشركه لما لقيت ورد اصفر مزروع قدامها فرحت قطفت واحده قام العامل شافنى من بعيد وافتكرتنى واحده ماشيه فى الشارع عادى وقالى عيب كده يابنتى مايصحش انتى كبيره على كده :)
قام الامن سكته وقاله دول ضيوف للشركه على فكره ولولا كده كنت اتضربت مثلا

طبعا مش دى الورده اللى قطفتها بس يمكن من اجمل الصور اللى عندى عالجهاز

ايه رأيكوا فى حاجاتى؟
حتى لو قلتوا وحشه انا هحبها برضو :)