اول امتحانات ترم اول

لقد امتحنت اليوم فى تمام الساعه الواحده والنصف بعد منتصف الظهر أول المواد العجيبه بتاعتى فى الترم المنيل بنيله فى السنه اللى باينه من اولها دى.
الماده كان اسمها Expert Systems بتحكى عن الانظمه الخبيره وليالى الذكاء الاصطناعى والمشكله ان فاقد الشئ لا يعطيه.
الماده عباره عن كتله غباء فى غباء.
الدكتور ربنا يسهله بلاش الكلمه التانيه عارف ان احنا ماكناش بناخد سكاشن وان المعيده منها للى حدف مراته من البلكونه كل مايكلمها علشان تدينا سكشن يلاقيها نايمه نامت عليها حيطه البعيده.

ويوم ماربنا يكرمنا وناخد سكشن يدينا معيد غير المعيده والمشكله ان الماده اصلا مش تبع القسم بتاعنا.

رغم انى كنت نايمه امبارح وانا حاسه بقمه الرضا عن نفسى لانى مذاكره الماده دى كويس مع انى مش فتحتها غير مرتين بس لضيق الوقت كنت نايمه مغمضه عين ومفتحه عين واقل همسه كانت كافيه تصحينى مفزوعه من النوم.

اتفاجئت الصبح وانا صاحيه بدرى علشان انزل اشرح لعبير الحاجات اللى هى مش فاهماها ان رغده قرفانى مسدات عالموبايل قلت اتصل اشوف فيه ايه؟ لقيتها بتقولى ان فى ماده العيال بتوع باور بياخدوا فيها نفس المنهج لكن تحت مسمى robotics والامتحان بتاعها معاها والحل كمان ولو اقدر انزل علشان اشوفه لان فى حاجات احتمال يجيلنا شبهها خصوصا اننا داخلين نشوف الاسئله لاول مره وده لان المنهج مش ثابت من سنه للتانيه ف مفيش نماذج سابقه.

احترمت اوى تصرف رغده ويمكن ده كان محاوله لتصليح موقف ندل اوى هى عملته قبل كده من سنتين وهى عارفه انى مش بتأخر عنها او غيرها وكل اللى مش فاهم حاجه او ناقصه حاجه بكلمها ليه.

لكن اتغظت اوى لما افتكرت مكالمه نورهان هانم امبارح الصبح لما اتصلت وصحيت لها من النوم علشان تكمل حاجات ناقصاها ومع كده لما سألتها هو فى ورق جديد غير اللى معايا لانها عارفه انى مقاطعه الكورسات ومش باخد خالص قالتلى لا رغم ان الامتحان اللى رغده جابتهولى كان معاها.
لكن ماندمتش لانى ببساطه بقالى خمس سنين بدى وبيتنكر الجميل يبقى الاهم ان ربنا شايف وعارف.

الدكتور بقى جاب امتحان زى الزفت وعايز يتحل فى 5 ساعات مش 3 وقال ايه الامتحان واضح.
روح ياشيخ وعندى كلمه واحده ليك " روح منك للى كلت دراع جوزها هى تخلص حقنا منك "

الماده الجايه اكبر المصايب والبلاوى
لسه لاول مره هفتحها ودى حاله نادره عمرها ماحصلت قبل كده.
ربنا يستر خصوصا ان الامتحان يوم الاربع يعنى مش قدامى الا يومين اتنين
يالهوتىىىىىىىىىى
والله قعدتى دى حرام حرام حرام

كان هذا موجز انباء اول ايام الامتحانات ونلتقى كل حد واربع مع موجز جديد لانباء الامتحانات فى السنه اللى مش باينلها لون دى.

المراجع تاندينى هل من مجيب؟ !!

ملحوظه ظوغنططه
انا اخدت عهد ان دى اخر سنينى فى الكليه ربنا ييسر ومش هزعل على اى حل حليته وحش وذلك لان بقيت مش فى دماغى غير ان السنه تخلص مع انى كان نفسى اطلع السنادى بامتياز لانه كان هيفرق معايا فى التراكمى انما شكلها لو صفصفت على جيد يبقى اشطه.
النهارده حليت كويس بالنسبه يعنى اكتر ماتوقعت لكن الاعتراف بالحق فضيله الحل وحش والامتحان اوحش.

جود باى
سى يو الاربع بقى :)