نسيت انساك

حبيبى مهما رحت بعيد معاك دايما

وبعمل ناسية ومابنساش فى يوم ابدا

غيابك طال ولا عارفه اعيش حياتى مع العايشين

غيابك طال وتعدى كل ليله عليا سنين

الجميل فضل شاكر

نسيت انساك

.......

والله مااعرف جايه هنا ليه

من اول ماعرفت ان النت رجع وانا عماله اقول هكتب ...لا هكتب.. لا هكتب ..
لكن اللى اعرفه انى مكنتش عايزه اقول اللى هقوله ده بالذات
انا عماله اكتب الكلام وامسحه ومش عارفه لا بكتبه ليه ولا بمسحه ليه

بس الضغط واصل بأعصابى اخره ولازم اتكلم
اولازم اكتب لانى خلاص مابقيتش اتكلم ولا مع اى حد
حتى عبير

عبير اللى بقت فى حياتى زى الشبح
حاجه بشوفها فى الجامعه لا بعرف بشوفها ليه ولا بتختفى ليه

مش عارفه ليه مابقيتش ازعل او بمعنى اصح بعمل مش واخده بالى من اللى بيحصل علشان مش عايزة ازعل
بس المواقف عماله تتحرك قدام عينى دلوقت كأنى لسه واخده بالى منها دلوقت

مش عارفه ازاى احضنها جامد لانى بقالى 3 ايام ماشفتهاش الاقيها بتسلم عليا ببرود

مش عارفه ازاى تقولى عايزة امشى اقولها انا عايزة اقعد معاكى وعايزة اتكلم معاكى تقولى معلش اصلى ماليش نفس وعارفه ان الكلمه هتزعلكبس مش عندى غيرها

مش عارفه ازاى تشوفنى بعيط قدامها فى الجامعة وفجأه وهى ماتعرفش بعيط ليه وتتجاهل دموعى بسهوله اوى وماتفكرش حتى تقولى مالك ولا ليه بتعيطى

والله مش عارفه دلوقت ليه ضحكت لما كتبت الكلمتين دول
يمكن بضحك على نفسى او على خيبتى مثلا

هى مبسوطه بصداقاتها الجديده وانا بقيت مبسوطه بسكوتى الدايم وهدوئى الغريب الدايم

كتير بحس انى مش زعلانه
وكتير بحس انى مش فارق معايا

لكن الاكتر بحس انى مش عندى اسعتداد اضيعها لكن لو هى مصره انا مش هعمل حاجه غير ان سكوتى هيطول
وساعتها مش هعمل حاجه غير انى هستمر فى سكوتى

يبدو ان السكوت بقى هو الحل
اصفى لوحدى وازعل لوحدى

وبعدها هكتب على نفسى لا صداقات بعد اليوم
بس ناقصنى انى لازم اتعلم كيف لى ان اعيش لنفسى فحسب اهو شويه كلام لغه عربيه مالهمش لزوم

ومانساش برضو انى دايما بعرف اوفى للى هيدونى على دماغى انما برضومش بنسى اظلم ناس واجرح ناس بيبقوا اساسا مايستاهلوش الظلم ولا الجرح

مش عارفه فى ايه
هوانا كده ليه؟

تقريبا الموت هو الحل
انا عايزة اروح عند ربنا
عايزة ابقى مع بابا ومحمد الفارس الملثم علشان هما وحشونى
واصلا هما اللى بحبهم وفوق يبقى اطلع عندهم وخلاص

حقيقى حاسه انى ضعيفه اوى من غيرك يابابا
وحقيقى وحشتنى يامحمد ماشفتش ولا هشوف زيك ياريت الدنيا كلها وانت لا
او ياريتك خدتنى معاك

وأنا متغاظه!!

أوقات بوصل ذروة الغيظ والغضب 

وببقى مش قادره اكتم 

لكن من كتر مابيبقى الموقف صعب بقابله بسكوت

خصوصا لو اللى انا تعبانه منه ده اساسا حد انا ماقدرش اتكلم معاه او حتى ازعله منى

فبقابل دايما قمة غيظى وغضبى بسكوت  وسكووووووت طويل يصل لبال اللى قدامى على انه لا مبالاه فى حين انه قمة الضغط العصبى عليا

أوقات بقول ان اللى يوصلنى للمرحله دى مفروض انى اخرج الغيظ ده فيه مهما كان هو حد غالى او قريب لمجرد انه وصلنى للحاله دى 

وأوقات بقول لأ

مش عايزه اقول حاجه فى وقت غضبى اندم عليها بعدها 

بس ده بيتعب اعصابى فعلا وبيوترنى وبيفقدنى تركيزى كمان

بس فى كل الحالات بتبقى النتيجه سكوت منى أو سكوت مع نظره استنكار للى قدامى يمكن تحسسه بغلطه

مش عارفه ليه افتكرت كلمه قريتها عند حاتم مره لما قال ان مش مفروض نبكى على حد علشان أكيد مش يستاهل اننا نبكى عليه ولو كان يستاهل مكنش خلانا نبكى من الاساس

وقتها ولحد دلوقت انا مقتنعه بالكلام ده اوى انما للاسف مقدرتش انفذه 

يمكن لانى فى وقتها شفته صح جدا لكن بحساب المواقف بعدها اكتشفت الحقيقه المره هوان مش كل الناس اللى بتزعلنا مش تستاهل نبكى ؟!

لانهم أوقات بيزعلونا وبنبكى لكن لانهم يستاهلوا فعلا فبنضطر ننسى الزعل لاننا مانقدرش ننساهم او نبعد عنهم

لكن يفضل السؤال

مفروض احاسب اللى يغيظنى بذنب غيظه ليا؟ علشان انا اهدى

ولا ابقى عليه وامسك نفسى علشان مش اتصرف تصرف ممكن بعدين اندم انى عملته أو احس بالذنب ؟وافضل ضاغطه على اعصابى
!!!!

يوم من عمرى

كان يوم مش طبيعى

من اول الصحيان الساعه 6 الصبح لحضور محاضره المبجله الدكتوره محاسن وحضور محاضره وسكشن بعدها لحد ماخلصنا الجامعه الساعه 1:30 ومشينا انا وعبير علشان ننزل القاهره نحضر حفل توقيع أنا أنثى

وفعلا وصلنا تقريبا الساعه 4 وقابلنا حبيبتى مى حبيبة الروح اللى كنت نازله اساسا علشان اشوفها وكان معاها كيكى

نزلنا احنا الكل والتاكسى الله يعمر بيته وصلنا لحد المركز اللى كان فيه الحفلة

وجت المجنونه مى وزعت علينا طقم مصاصات ونزلنا زى العبط احنا الاربعه قدام المركز وكلنا نازلين مص فى المصاصات وطبعا انا امتنعت عن الدخول لان شكلى هيبقى عره لو حد اعرفه قفشنى بمصاصه يعنى عيب اوى

المهم مين فعلا اللى قفشنى عالباب ؟ احمد الصباغ لانه كان شافنى قبل كده فى ملتقى مدونى الشرقيه الترم اللى فات

وبعدها جه احمد مهنى وطلب مننا ندخل جوه المركز واتكسفت اوى رحت راميه البتاعه من ايدى وداخله جوه انا والطقم اللى كان معايا

باختصار شديد شفت ايناس لطفى وقلب ينبض بالحب القمر اللى سلمت عليها عالباب وانا عرفتها من صورها لكن هى مش عرفتنى واول ماقلتلها اخدتنى بالحضن وقالتلى يتعملى ايه هنا ياخلبوصه :)

وسلمت على بسمه صحبتها وجوه عرفت محمد غاليه من صورته بالشبه كده واخيرا واخيرا جه القمر اللى غالى عليا جدا جدا وهو السبب التانى فى انى اروح الحفله دى

الاب الروحى ليا فى بلوجر وميض ابتسامه اللى ياعينى كان وراه عزاء وجه مخصوص علشان انا قلتله انى هحضر

الراجل ده بجد دعمنى كتير وكان بيحاول دايما يوصلى ان بابا مش مات
وفعلا لقيته اخيرا بيتصل بيا بيقولى انا بره قدام المركز اخرجيلى وخرجت وسلمت عليه هو وابنه الصغير اللى هو اكبر منى يجى بخمس سنين ودخلنا وارخم حاجه انى ماعرفتش بعدها اتلم على البت مى لان الاب الروحى بتاعى مكنش ينفع اسيبه

لحد ماالحفل بدأ وانا الصداع خلاص زاد عليا ومابقيتش قادره اتحمل وخلاص مش عارفه اتكلم مع حد ولا افتح عنيا والتعب اللى جالى وانا مسافره زاد اوى وخلاص الناس بقت بتكلم وانا تقريبا فاصله

طلبت من عبير اننا نمشى وبالصدفه ببص ورايا لقيت عمرو فاروق ورحت سلمت عليه وحتى ماقدرتش اتكلم رحت واعتذرت انى تعبانه وعايزه اروح

وبالصدفه البحته لقيت واحده واقفه جمبه بتقوله مين دى ياعمرو ماتعرفنا قام قالها دى "...."
لقيتها بتقول مش معقول ازيك وهى مذبهله وقالتلى انا كيارا
ياخبر مش معقول ازيك؟

المهم خرجنا احنا الكل وانا خارجه من البوابه لقيت بدوره او قلب ينبض بالحب بتنادى عليا وبتقولى ياندله كده ماشيه من غير ماتسلمى؟

وقفت اسلم عليها واتفاجئت ببنوته كده بسكوته جدا بتقول هى فين"......" اللى بينادوا عليها دى؟

كانت جمبها عبير شاورت لها عليا لقيتها جايه بتقولى بدور عليكى من ساعه ماجيت وراميه ودانى فى كل حته علشان اول مااسمع اسمك اجيلك اسلم عليكى

انا بقى واقفه مخضوضه ومش عارفه ارد وبقول مين اللى مهتمه بيا اوى دى يابختى بقى فى ناس بتحبنى وكده فقلتلها اهلا ياجميله وكده بس مين بقىىىىىى؟؟
طلعت فى الاخر ضد التيار

ياخباااااااااار انا تنحت بجد يابنتى هو انتى؟
بنت زى السكر وحاسه انى اعرفها من زمان

لقيتها بتقولى وشك مدينى احساس انى اعرفك او شفتك قبل كده
ومع انى حاسه نفس احساسها قلتها انى متأكده انى مش شفتها قبل كده
مشيت معاها من المركز لحد اول كوبرى قصر النيل تقريبا وقعدنا نرغى كتيييييييييييير كأننا اصحاب سنين
وفى الاخر سباتنا ورجعت تاخد اختها من عمرو وكيارا ومى كمان سابتنا هناك وراحت لباباها
وبدأت رحلة عذاب عبير للاسف لانى كنت حمل تقيل اوى عليها كانت ماشبه ماسكانى لانها حاسه انى مش تمام
ومكنش فى مواصلات للاسف واتمرمطنا
وجيت انا فى الاخر مش اتحملت كل البهدله دى وضعفت زى العاده فى الاخر وواحنا خلاص فى بلد عبير ونازلين من العربيه
اوبسسسسسسسسسسسسسسس
دخت وكنت هقع من طولى لولا هى اخدت بالها وسندتنى وواقفه ياعينى مش عارفه تعمل ايه لحد ماجت واحده ست والله حتى مش اعرف شكلها ومش عارفه طلعت منين فجأه كده سندتنى ونيمتنى على صدرها وقالتلى اسندى عليا يابنتى انا زى مامتك

حضنها فرق معايا اوى الست دى رغم انى كنت مكسوفه اتسند عليها
المهم رحت قتيل عند عبير ودخلت نمت بهدومى
وصحيت الى حد ماكويسه

بس لسه حاسه انى تعبانه
يمكن كنت بتمنى ابقى فى حالتى الطبيعيه علشان اقدر اعرف ناس كتير كانوا موجودين واكيد معظمهم اصحابى
بس فى ناس للاسف زعلت انى مقدرتش اشوفهم لانهم ماجوش اصلا

يلا تتعوض بقى
مبسوطه اخر حاجه انى شفتك يااحلى مى فى الدنيا
ومبسوطه اكتر انى شفت السكره سويت فيوليت

ونفسى اشوف بقيه الناس اللى بحبهم بقى بجد:(

بس اكتر حاجه غاظتنى ان معظم اللى شافونى امبارح وقبل كده ومنهم ضد التيار قالولى مكانوش متخيلين انى كده دول فاكرين انى حاجه صغيره كده فى الحجم وقصيره مع انهم لما بيشوفونى بيتصدموا لانهم بيشوفوا بنوته بنوته يعنى مش هزار حتى لو ملامحى تدى على اطفالى شويه وأصغر من سنى شويه برضو :)

يلا اهو يوم بقى والمره الجايه اشوف الباقى
ادعولى بقى علشان ربنا يقومنى بالسلامه :(

وأخيرا النتيجه

أخيرا النتيجة ظهرت النهارده

فى الاول زمان كنت ببقى متوتره وقلقانه ومش عايزاها تظهر واقول خايفه منها وقال ايه ده كان ايام ماكنت شاطره وبطلع أول المدرسه وكده

لكن بقى دلوقت يافرحتى وأيام الوكسه بقيت بقول ايه وقوع البلا ولا انتظاره
كنت مستنياها واقول استر يارب

بدأت الحكايه بيوم عجيب وغريب رحت قبضت من نقابة بابا وانا مبسوطه ان المعاش كان اتوقف وانا قدرت اصرفه برضو لما خلصت ورقه فى السريع علشان امى داعيالى وربنا بيجبنى بس
وخارجه بقى ايه دماااااااااغ وحاطه الايبود فى ودانى واقول بلا وش العربيات واسمع ومعليه الصوت وعايشه بس هموت من القلق لانى عارفه ان النتيجه هتظهر النهارده وفيروز عماله تغنى اخر ايام الصيفيه واخر تمام

قوم ايييييييييه الاقى اول ماقربت من المبنى الواد احمد فى وشى بيقولى بضحكه ماليه وشه

هو: مبروووك
أنا: مبروك على ايه ياواد انت ؟
هو: على نتيجتك
انا: اسم الله ...اتريق اتريق ربنا يستر هو عادل جه النهارده؟-ده رئيس الكنترول-
هو: لا ياباشا وهيجى ليه؟
انا: ياااااض الله يخرب بيتك ماهى هتظهر انا مرعوبه
هو: نعم ؟ بتهرجى
انا: ايه يااحمد فى ايه؟ هى النتيجه ظهرت-الخضه دبت فى ركبى-
هو: ياسلااااااااام اه طبعا هو انتى ماتعرفيش !!! دى ظهرت بالليل عالنت
انا: وانا عملت ايه يااحمد؟ وعبير عملت ايه؟ وانت طيب؟ -متسربعه وبتكلم بسرعه 100 كلمه فى الدقيقه-
هو: انتى تقديراتك كويسه بس مش فاكرها بالظبط
انا: الله يحرقك يابعيد طيب مش تتصل تقولى مادام ظهرت ولا تبعتلى مسج ولا حد يعبرنى
هو: والله مكنتش اعرف انا فاكرك عرفتى عموما ماتقلقيش

المهم وجرى على معمل الكليه
انا: الحقنى يااستاذ عاطف فذ قوم من على جهازك عايزة اشوف نتيجتى
استاذ عاطف: يابنتى ماتخافيش انتى جبتى كويس انا شفت تقدريراتك ماشاء الله كويسه
انا: لالالالالالالالالا عايزة اشوف

وابسسسسسسسسس السيرفر واقع والموقع وااااااااقف

هطق هموووووت ياناس امه لا اله الا الله اطمنت وانا مش عارفه حاجه
المهم رحت بتوصيه من استاذ عاطف الله يكرمه لواحد فى شئون الطلبه وجابهالى لانهم مش راضيين يعلقوها فى الجامعه

طبعا لقيت النتيجه زى الزفت والحمد لله
اتصدمت لما لقيتنى جايبه مقبول فى الداتا بيز خصوصا انى بكره اشوف ال " ل" فى نتيجتى بتعقدنى ومش شفتها من ايام دسته المقابيل اللى كنت جايباهافى اعدادى هندسه ولقيتنى فى الاخر جايبه جيد

المهـــــــــــــــــــــم

قوم ايه النتيجه بقى طلعت انا والبت عبير زى بعض بالظبط بس بفرق بسيط هيخلينى انا جيد جدا وهى جيد مرتفع

والله اتغميت خصوصا ان ترتيبى على القسم الحمد لله تراجع الى الخلف وبقيت الخامس بدال التالت او الرابع

بس فرحت علشان عبير لان ظروفها كانت وحشه وكده يعتبر هى جايبه كويس اوى
نفضت للسكشن الاولانى لانى زى عادتى يوم النتيجه مبسوطه زعلانه مش بركز فى حاجه
وكنت قافله قفله مايعلم بيها الاربنا عبير مش سابتنى فى حالى

وخرجنا انا وهى اتغدينا بره وظبطنا نفسنا
ورجعنا متأخر على السكشن اللى بعده كمان

اما عن المحاضره الاخيره اللى الدكتور الواطى بتاعها مدينى جيد فى مادته وانا مواده دايما بقفل فيها الامتياز فكنت مش طايقاه وقضيناها تهييس بقى وانا نسيت الغم انا وعبير واحنا قاعدين نتريق عليه وعلى النتيجه

وكله الا لما سالتنى عن الاستيكه بتاعتى قالتلى ايه ده هى مش دى الاستيكه اللى كنت بكتب ليكى الاسئله عليها؟ قلتلها اه
قالت لازم نكافئها على نجاحها النهارده وتفوقها معانا تيجى نعزمها عالغدا بره ؟ :))

والله يوم عجب
المهم تهييس بقى واللى عمله ربنا خير
وجيد جدا النهارده بكره تكبر وتبقى امتياز ايه يعنى هموت نفسى بلا هم

جيت جبت الخبر المشئوم لماما وهى طبعا زى عادتها باركتلى من قبل مااقولها النتيجه وهونت عليا شويه وبينت انها مبسوطه بيا :)

اخر اليوم اتفقنا انا والبت بيرو ازاى هنروح حفل توقيع أنا انثى بكره وقعدنا نخطط وندبر وفى الاخر رسمنا المخطط وروحنا
وادى يووووووووووووووووووووووووم

بلا نتيجه بلا هم :)