واخيرا عوده للبيت بعد غياب اسبوعين بره
احساس حلو اوى الاستقبال اللى البيت استقبلنى بيه مع ان دى مش اول مره اغيب بره لكن المده المرادى كانت اكبر من اى وقت فات
المرادى رجوعى كان مع مناسبه نجاح اخويا
واحلى حاجه انى رجعت لقيت نينا عرفت انى جايه فجت تستنانى هنا من كتر ماانا واحشاها :)
ومع ان الرجوع مكنش متخططله خالص على امبارح ومكنش فى نيتى بس ارداه ربنا بقى خلت الظروف تنزلنى
فرحت اوى بطريقه سلام محمد عليا وبالليل كمان لما رونى رجع حضنى حضن جميل اوى بجد
حسسنى انه كان مفتقدنى فى البيت وقالى كتير اوى انى وحشته
عوضونى عن شويه الغربه اللى حسيت بيهم بره الاسبوعين دول
الفتره اللى فاتت كانت سيئه جدا جدا جدا
مشاكلى مع عبير بتخنقنى خصوصا انها دايما بتقولى بكره خناقاتك لانك دايما بتطلعينى غلطانه
ومع ان عبير بتبقى متأكده انها فعلا فى كل الخناقات بتبقى غلطانه لانها عارفانى بقدر اكظم غيظى اوى واتحكم فى انفعالاتى علشان مش اخسرها بيخلينى اخرج عن شعورى اوقات كتير اوى لما ابعدعنها علشان افرغ ضيقى منها
ولانها دايما دايما مابتحبش تعترف بغلطها او تعتذر انا بتعب جدا لانها مش بتقدرنى
واكتر حاجه بتزعلنى انى دايما اقولها انا مش ببقى عايزاكى تعتذرى لما تزعلينى لكن ببقى مستنيه منك ولو نظره حزن انك زعلتى حد بيحبك زيى علشان انا عارفه انها مش بتحب تعتذر انا بتخنق اوى
ونفسى بتصعب عليا اوى لما الاقيها بتتجاهل زعلى منها وانعزالى لوحدى لما اكون زعلانه منها وهى عارفه كده والاقيها جايه تهزر وتضحك عادى كان مفيش حاجه حصلت وكأنها ماغلطتش ولا زعلتنى
واللى يتعبنى اكتر واكتر انى ماحبش اشتكيها لحد يعرفنى ويعرفها علشان مفيش حد يعرف اللى بينى وبينها ودايما اقول اللى بينى وبينها احنا بس اللى نقدر نصفيه ومع كده هى عادى ممكن تحكى لاصحابها مشاكلنا وبقدرتها العجيبه على تجاهل المواقف اللى بتبقى هى غلطانه فيها دايما اكون انا الغلطانه والوحشه
ولو حصل صدفه وعرفت انها حكت لحد لما يجى يلومنى وجيت انا كمان بينت الموقف الاقى الكل يغلطوها هى وده اللى بيضايقها
انى انا الوحيده اللى بتطلع غلطانه معاه لانها زى ماهى بتقول بتصرف بملائكيه صعب تبقى موجوده دلوقت
انا مش غلط
انا عارفه كده لكن صعبانه عليا نفسى منها
ليه تطلعنى وحشه
ليه تحكى لحد مشاكلنا مع انى بحرج اى حد يدخل بينى وبينها
وليه مش بتاخد بكلامى لما بقولها ماتتصرفش وحش مع اصحاب الشقه لانهم مش غلطانين فى حاجه وانها مفروض تحسن طريقتها فى الكلام معاهم علشان ماتسمحش لحد انه يقول عليها كلمه وحشه حتى ولو بينه وبين نفسه
وليه بتسيبنى اسمع كلام وحش بيتقال على اسلوبها فى الكلام مع انى قايلالها انى مابحبش اسمع حد يغلط فيها خصوصا انى بدافع وانا عارفه انى مش ببقى على حق
ليه لما قلتلها الف مره حسنى طريقه كلامك معايا انتى عارفه انى بزعل وحساسه تجاهلت كلامى
وليه لما قلتلها حاسه انك متغيره معايا وبتبقى كويسه طول ماانتى بتتكلمى مع محمد قريبك واول ماتيجى عندى تبقى متنشنه قالتلى طظ فى احساسك
ليه بتجرحنى وبتستهزئ بيا
ليه لما خرجت لوحدى بالليل اتمشى وهى عارفه انى بعيط مافكرتش تمشى ورايا وتحاول تخفف عنى وهى عارفه انى باستريح لما اتكلم معاها
وليه لما رجعت لقيتها بتضحك عادى وشفت نظرات الحزن فى عيون اسماء وامل علشانى وهى اكتر حد كان بضحك وانها مش مهتمه بحزنى اللى هى سبب فيه
وليه دلوقت هى اللى زعلانه وواخده جمب منى
؟؟؟؟؟؟؟؟؟؟؟؟؟؟
كان لازم تكون عندى الشجاعه علشان اقولها انى استعجلت بالنزول للبيت علشان اهرب منها قبل ماتصرفاتها معايا تخليها تخسرنى واخسرها مش علشان ماما اللى بتتحايل عليا انزل
مكنش لازم اكدب واقولها فلوسى خلصت علشان انزل
كان لازم اقولها انى بهرب قبل مانخسر بعض
يمكن لما تحس انها ممكن تخسرنى تراعى مشاعرى شويه
نفسى الاقى اجابه للاسئله دى
هى ليه بتعمل كده؟
معقول تكون هى زى ناس كتير اوى مابيعرفوش يقدروا اللى بيحبوهم بجد؟
معقول تكون هى كماله حكايه صداقاتى الفاشله اللى مابتدومش ابدا؟
هى وصلتنى معاها لمرحله انى قلتلها نفسى ابطل اخاف عليكى اوى كده ومش عارفه
قلتها نفسى ومش قادره بس لازم اقدر
لسبب واحد هو ان خناقتنا سوا كلها بتبقى بسبب خوفى عليها
خساره ياعبير
خساره
هناك 4 تعليقات:
هقولك الكلام اللى انا كاتباه على الميل و على الفيس بوك
(كفاية اوهام مضحكة .. ما تتوقعش من حد مهما كان قريب منك انه يصدر رد الفعل اللي انت ممكن تقوم بيه في نفس الموقف لانه ببساطة "هو "مش "انت" )
عارفة ليه بقوله لانى فعلا بمر باللى انتى فيه مع الفارق
انى واثقة انها من الناس اللى بتقدر اللى بيحبها لكن مش عارفة ليه معايا انا حاسه العكس !!!
سيبك انتى بقى حمدلله على السلامة
و اكيد اكيد يعنى ضلمتى البيت عنكم ^_^
ربنا معاك فى المشروع و يخلص بقى علشان ارخم عليك براحتى (:
قصتك مع عبير فكرتني بقصتي مع وحده صاحبتي على قد ما بحبها فضلت اتحمل و انسى بس الفرق انها دايما بتعتذر
بس المشكله لما يبقى الوضع كده دايما زعل و خناق و كل واحد واخد على خاطره من التاني و بيعاند دي تبقى علاقه صحوبيه مش سليمه ولا صحيه و دي بقا واضح نهايتها ايه
ربنا يهديها مش عارفه اقولك ايه بس لو بتهمك و عايزه تحلي الموضوع حاولي تبصي من منظارها و تفهمي هي بتتصرف معاكي كده ليه و اضن انتي اكثر وحده تعرفيها هنا
ولكم بااااك
سويتى
وانا مش هقولك غير انى اخدت ايامها نفس الكلام كوبى وحطيته عالميل :)
اهو المشروع خلص ياستى الحمد لله
فينك غطسانه؟!!
ميمى العسل
ازيك ياقمر واحشانى اوى اوى
انا بقيت بظهر اهو وانتى مختفيه ليه؟
يارب تكونى كويسه يارب
هقولك ايه عنها غير انى بحاول كتير احط نفسى مكانها وكل ماحاولت كل ماساءت عندى اكتر لانى بلاقى انى مكنتش هعمل زيها خالص :(
عموما ربنا يعمل اللى فيه الخير
ماتشغليش بالك واظهرى انتى بس
منوره ياقمر
إرسال تعليق