عيد وفضفضات وخيانه

كل سنه وحبايبى طيبين .دى تهنئه خاصه للى بيدخلوا هنا بس وعيدكوا وايامكوا سعيده يارب

وحشتنى أوى الكتابه هنا بجد مفتقده الفضفضه النفساويه البحته

بس العيد والحاجات الكتير اللى الواحد بيحس انه عايز يعملها رغم انى مش بعمل اى حاجه فيه وقضيت االعيد زى العاده فى بيتنا عالسطوح اوقدام الكمبيوتر:(

بس اللى حصل ان النهارده كان يوم عجيب

اصلى كنت بره لانى مش بخرج فى العيد خالص فقلت اهو عندنا شغل نخلصه انا وصحابى خرجنا واتغدينا عند واحده منهم وانجزنا لكن وانا راجعه بنت كده غلسه اوى ركبت جمبى وانا كنت راجعه وطالبه معايا نوم والبنت كانت بتتدخل وبتسأل اسئله كأنها وكيل نيابه وان من حقها عليا انى اجاوب انا بصراحه كنت بجاوب بس علشان مش اكون قليله الذوق بس انما انا بصراحه مكنتش طايقاها وتوقعت انها بنت بيئه لانها قليله الذوق اخر حاجه وانها مش متعلمه كويس لحد ماسألتنى انتى فى ايه؟ وجاوبتها لقيتها هى كمان جاوبتنى من غيرمااسألها وقالتلى انها فى الجامعه

المهم انى من شويه كنت بسمع فيلم خيانه مشروعه وحاسه من ذهول الموقف اللى اصاابنى انى مش عايزه اقول غير يع يع يع الناس دى حسستنى ان الدنيا مافيهاش امان خالص وان الواحد كل مايفتكر انه هيلاقى الاخلاص فى حته لازم يكدب نفسه لانه مش صح

دول كلهم عمالين ينهشوا فى بعض وكل واحد عمال يخون ويخون ويخون وده ليه علشان ينتقم لنفسه من اللى خانه اصلا طب والكل بيخون ليه اساسا؟

بس هو ده حقيقى ولا لا؟

واكتر موقف أثر فيا هو بتاع الولد اخو شهد فى الفيلم لما قالها اننا بناخد فلوس منك واحنا مش قادرين نبص فى عنيكى علشان عارف اننا محتاجينها ولازم اسكت علشان مش قادر ابقى راجل واصرف على البيت وابويا العيان مكانك

حسيت بالانكسار اوى

يمكن صعب عليا انه ولد وشرفه بيتداس قدامه وهو مش قادر يدافع عنه لانه ذليل لكن برضه اللى عايز يبقى صح هيبقى صح مهما كانت الظروف

الموقف التانى اللى وقفنى وخلانى افكر هو لما هشام سليم فضل متمسك بالتدوير والتحقيق فى القضيه جه المحامى سامح الصريطى قاله اقفلها مادام الولد اتصلح يااخى ربنا بيغفر

هو صح اننا ننسى الماضى لان الحاضر بقى كويس ؟ ولا الخطيئه لازم نفضل نحاسب عليها حتى فى الحاضر مادام حصلت؟

مش عارفه الاجابه لحد دلوقت بس بيتهيألى ان الاحساس بالغلط وتصليحه فى الحاضر شفيع كافى علشان نتعامل بصفحه بيضا فى المستقبل مهما كان الماضى اسود

مش كده ؟ ولا ايه ؟!