انا خلصت هييييييييه

النهارده مش هسمي البوست مصيبات برقم لانى مش عايزة اتكلم عن الامتحان
هو كان Quality
ومكنتش راجعه مبسوطه بس دلوقت مبسوطه

مبسوطه لانى خلصت

مبسوطه لانى هرتاح من الكتب والمراجع والورق
اينعم هرجع لشغل المشاريع والسفر والبهدله علشان مشروع التخرج
يعنى حتى الاجازة مش هنرتاح فيها

بس برضو هو ده الشغل
مش الدح والحفظ والمسائل

مبسوطه لانى هخرج فى سفريات كتير
هغير جو
هرتاح واصيع انا وعبير لوحدنا
هبعد عن الخنقه
ومبسوطه كمان دلوقت حالا علشان سبب مش مهم اقوله

بس اهو كده وخلاص
ياااااااااااه مش مصدقه ان الامتحانات خلصت
هيييييييييييه
انا خلصت
انا خلصت
خلــــــــــــــــــــــــــصت
:)

خامس مصيبات ترم أول

النهارده كان امتحان ال 

facilities design

ودى بتعلمنا ازاى نقدر نعمل تخطيط ل

departments 

جوه اى مصنع وازاى كمان نرتب الماكينات وكده

الماده كان فيها كميه حفظ عجيبه وللاسف برضو كميه فهم عجيبه

المسائل فى كل شابتر كانت كل واحده بفكره والدكتور كلامه قشور فى المحاضرات يعنى بيدى عناوين بس ومعتمد على المعيده اللى ادتنا 3 سكاشن بس من اول الترم وبسلامتها مشغوله مع التمهيدى لانها لسه متعينه جديد وكمان التجهيز لان فرحها قريب 

الدكتور عاده فى مواده اللى درسهالنا قبل كده اتعودنا منه على الامتحانات الغير تقليديه وعدم الاعتراف بصعوبتها 

كنت رايحه الامتحان النهارده متوقعه اللى هيحصل زى ماحصل بالظبط لانى حلمت امبارح حلم اتحقق النهارده وعلشان كده مازعلتش

النهارده الامتحان كان 5 مسائل وبعد ما عدمنا صحتنا وجزء كبير من عقولنا فى حفظ النظرى الدكتور مش جاب ولا حرف نظرى

وكالعاده مسائل افكار انما الامتحان كان يتحل للى مذاكر كويس 

المشكله بقى انى حليت السؤال الاول وجيت ادخل فى التانى حليته غلط خالص رغم انى فاهمه وعارفه فكرته وحاله زيه قبل كده

ولحد ماوصلت اخر المسأله اكتشفت الغلط الشنيع اللى عملته من الاول للاخر ورجعت حليتها وتقريبا هى لوحدها اخدت منى ساعه وربع

كان فات ساعتين الا ربع وانا مش حليت غير سؤالين وفاضل 3

النص الاخير من الوقت او

اقل من النص كان ليه النصيب فى المسائل الاطول وانا بقيت بحل بسرعه ولا خط بقى ولا اى تنظيم ولا سطرت الورقه حتى

انجزت تقريبا بس سبت جزء صغير مالحقتش اعمله

امبارح حلمت انى رحت اللجنه متأخر لانى راحت عليا نومه ورحت بعد نص الوقت ولحقت اعمل فيه احلى من اللى فاتنى

ورغم انى لاول مره بنام وانا مش محدده هلبس ايه وانا خارجه ورغم انى برضو الصبح مكنش فيا دماغ ولا افتكرت الحلم الا بعد اللجنه

انا الصبح لبست لبس وبعد مالبسته غيرته للبس تانى هو نفسه اللى انا كنت لابساه فى الحلم :)

علشان كده رغم ان مفيش حد فى الماده دى ولا امتحانات الدكتور ده بيبقى عارف هو جاوب صح ولا لا

انا حاسه انى عكيت شويه بس عملت كويس 

من اظرف المواقف ان عبير طول اللجنه كانت بتطلب منى الاستيكه ولا اربعين مره

وانا اتخنقت منها واستغربت كده خصوصا انها طلبت الاستيكه العاديه بالذات مش الاستيكه القلم 

وانا مستغربه انها اول ماخدتها شالت الغلاف بتاعها 

ولقيتها بعد اللجنه نازله زعيق فيا مره واحده وانا مش فاهمه اتاريها ده كله كانت بتبقى كاتبالى حاجات هى عايزاها عالاستيكه

ولانى خبرتى فى الغش صفر مش فهمت كده :)

فاضل ماده يوم الاربع بس

ربنا يستر ودى نحكى حكايتها يوم الاربع باللبل لما دماغى تكون فضيت بقى 

C U

Don't forget me from eldo3a2 

:)

     

رابع مصيبات ترم أول

انا زعلانه أوى :(

النهارده كنت رايحه امتحان ال Data base وانا واثقه من نفسى وحاسه انى راضيه جدا عن نفسى لانى كنت مذاكره كويس مع ان الماده كان فيها حفظ كتير بس لاول مره بحس انى حافظه كويس وفاهمه اللى عايز يتفهم وده لانى كنت ضايعه فيها طول الترم والدكتور بينيم فى المحاضره خصوصا ان المعمل بيبقى ضلمه علشان الداتا شو.

حتى مش حسيت بنفس التوتر اللى بحس بيه قبل كل امتحان الصبح او بالليل
وفعلا دخلت الامتحان واتبسطت لما لقيتك السؤال الاول كويس وانا حالاه فى امتحانات قبل كده ليله الامتحان.
والتانى كمان

والتالت حسيت انى خفت منه رغم انى شفته قبل كده فسبته ورحت للرابع اللى هو انا برضه حليت زيه قبل كده

ورجعت للتالت وانا مش عارفه اعمل ايه؟
حاسه ان حاجه عمتنى وخلتنى ماافهمش ان اسئلته مرتبطه بنفس ال D.B اللى هو حاطها فى السؤال التانى ولقيت نفسى تايهه ومش عارفه اعمل ايه؟

حليت برئوس الجداول وكأنه سؤال جديد وللاسف الدكتور كان جه ومشى خلاص وانا مش اخدت بالى انى هحتاج اسأل فى حاجه
ولما مش لقيت حد سأل فى نفس الحكايه قلت يبقى انا اللى غبيه ومش فاهمه ومش رضيت اتكلم.

مش عارفه
انا خرجت من اللجنه ولما عرفت فضلت احمد ربنا على اللى حصل واشكره وانا مخنوقه لان الامتحان بجد كان تقفيله سهل واجيب امتياز وبالفول مارك كمان والناس المذاكره كانت مبسوطه وانا مش عامله كويس

لما بفكر شويه بحس انه قدر من عند ربنا لانه مش اراد انى اقفل الامتحان علشان كده عمانى عن الربط بين السؤالين
مش قدامى غير انى اقول الحمد لله على السراء والضراء والحمد لله انى حمدته وقت الضيق

يلا ربنا يهون بالاتنين الباقيين

صحيح

مش عارفه هفضل لحد امتى ابلع فى تصرفات رفاء واسكت لها واسكت واسكت وانا حتى بكلمها وانا عارفه انها بتتصل دلوقت بيا تكملنى وهيا لسه مافاتش نص ساعه على كلام زى الزفت قايلاه فى حقى بدون وجه حق.
ومش عارفه لحد امتى هرضي خاطرها واقف جمبها لما تلجألى تشهدنى على حد زعلها وانا عارفه انها بتزعلنى وبتغلط فيا وانا ساكته بحجه ان ليا عند ربنا واول ماتضحك عليا بكلمتين اصفالها.
ولا مفروض انى اعاملها بمعاملتها واحرق لها دمها قصاد تشويهها لصورتى قدام الناس وهى بتستغل انى مش بدافع عن نفسى قدام الناس اللى اساسا تعرف اخلاقى وسلوكى كويس؟

ولحد امتى هفضل اتحمل سخافات دكتور زفت لمجرد ان روحى فى ايده بماده ومشروع التخرج؟!

ولحد امتى هتحمل عقاب الاء ليا بنظراتها واسلوبها الغبى معايا فى الكلام لمجرد ان ربنا خلص حقى منها وزى مافى يوم غدرت بيا دلوقت اتغدر بيها وهى حست ان ده ذنبى اللى ربنا بيخلصه وبتعاقبنى وكأنى انا اللى عملت فيها كده؟!

اوقات بحس نفسى سلبيه بسكوتى عن حقى

هو انا كده سلبيه وانا بقول يارب خدلى حقى؟

لكن كمان انا بقول انى مش عايزة اعمل حاجه فى وقت ضيق اندم عليها بعد كده لما احس انى خنقت حد بسببى او زعلته منى

انا بقيت مش عارفه اعمل ايه؟
ولا اتصرف ازاى مع الناس؟

تالت مصيبات ترم أول

النهارده أو امبارح بتوقيت بعد نص الليل عدى تالت امتحان

ياااااه حاسه إن الكوابيس عماله تتزاح من على قلبى شويه بشويه

الماده كان اسمهامنظومات الخدمات والتصنيع

service and manufacturing systems 

 والمفروض انها بتتكلم ازاى تعلمنا

soft skills

هتنفعنا قدام لما نبقى مهندسين ده لو ربنا اراد يعنى

حكاية الماده دى ومشكلتها تتلخص فى اننا مكنش عندنا منهج فيها لانها كانت بتدينا مهارات ازاى ندير

اجتماع وازاى نوزع المهام فى ال
team work 

على أفراد الجروب وازاى نتعامل مع الناس بحيث نقدر نوظفهم لتلبيه رغباتنا وهكذا

محاضراتها كانت كلها فيديوهات متصوره لاجتماعات ناس بره اجانب وكنا نقعد نتفرج عليها ونحللها ونقول ملحوظاتنا
وكنا برضه ناخد

 questionnaires 

فايدتها فى الحياه انها بتعرفنا نفسنا واستايل كل واحد فينا فى التعامل وطريقه التعليم ومواصفات
  الكاركتر بتاعته ونعمل  

presentations فيها ونيجى نعرضها

الدكتور قال انه حاول يلغى فيها امتحان الترم لكن الكليه مش مقتنعه ان فى ماده مافيهاش  امتحان.

ماعلينا المهم بقى الامتحان الدكتور استغبى في شويه وجاب حاجات كانت عايزة خريجين  قسم آداب اجتماع هما اللى يحلوها مش احنا لكن اهو الامتحان كان ظريف وعدى الحمد لله عقبال اللى جاى.

نيجى بقى للمهم 

النهارده كان يوم عسل بكل معنى الكلمه مش لان الامتحان كان حلو بس انما لانى قابلت النهارده ناس كتير بحبهم وبقالى كتير مش شفتهم.

أول واحد هو استاذ محمد ابراهيم مدرس الكيمياء بتاعى فى ثانوى اللى كنت بعشقه وافتكرله موقف ظريف مش بنساه ابدا

هو كان مشهور بأن امتحاناته بتبقى معقده أوى وتصحيحه أعقد واعقد وبيدق عالكلمه لدرجه انه قالى مره ان فى طالب فى امتحان الفاينال جاب 50 من 50 فكان مفروض ورقته تتراجع وهو اللى راجعها نزل الواد ل 41 من 50:)

الموقف بقى انه فى مره ادانا امتحان وانا جبت فيه 28.5 من 30 وكانت اول مره احقق الرقم ده معاه  وكنت مبسوطه بس كنت حاسه انه برضه افترى عليا وكان مفروض اجيب الفول مارك قام قالى هو انتى شاغله نفسك ليه؟

يعنى هما اللى اتعلموا مهندسين عملوا ايه؟ يابنتى لو صوتك حلو روحى طلعى أغنيه تفرقع تعيشك سلطان زمانك طول عمرك زى بتاعت لولاكى اللى جابت مليون جنيه ف اول التسعينات:))

وده طبعا كان هزار لانى أكتر واحده فى الطلبه بتاعته عرفت تصاحبه وكمان لانه كان بيحب بلدنا لانه قضى فيها ايام حلوه ف شبابه مع انه من سكان ومواليد الزقازيق الاصليين.

أنا آه مش كلمته لانى شفته وانا فى الميكروباص وهو ماشى بس فرحت لما شفته.

والتانى بقى كان وانا فى الميكروباص برضه وانا راجعه وكان المهندس احمد يعقوب وده كان مهندس فى الشركه بتاعت التدريب بتاعى فى صيف سنه تانيه وده كان حد ّذوق لابعد حد وكنت بحتل المكتب بتاعه لانه كان منعزل وهو تقريبا مكنش بيقعد فيه.

افتكر إن اظرف موقف معاه كان  لما كنت باروح الساعه 7 الا ربع الصبح لازم اكون مستنيه عربيه الشركه فى زراعه وفى مره اتأخرت وهو واستاذ صبحى خلوا العربيه مش تمشى لما عرفوا من البنت بتاعت علوم زميلتى انى فى الطريق واخروا الكل بسببى .

وكان نفسه يتكلم معايا بصفتى بدرس فى نفس الكليه اللى اتخرج منها وكمان البنت الوحيده فى الشركه هندسه والباقيين كلهم علوم بس كان محرج يتكلم لحد اليوم ده وانا فاكراه مش يعرفنى قالى انتى "..." صح؟

قلتله تمام هو حضرتك تعرفنى قالى سألت عن البطله اللى وافقت تتحرك فى مصنع فيه 490 راجل ومافيهوش ست واحده واثبتت أنهاأخلاق وشخصيه :)

وخلص الكلام وفى نفس اليوم المهندس محمد أنور اللى هو مديره ادانى فايل مليان ورق وزنقنى انى اقعد ادرسه وقالى علشان اخد راحتى اقعد فى مكتب المهندس احمد يعقوب

وفتحولى المكتب وانا معرفش انه هو ده اللى كلمنى

لحد مادخل ولقانى فى وشه قاعده على مكتبه قالى هو انتى ؟؟!!!

:))

وفضل بقى يحكيلى عن بنته ويورينى صور عيلته ومراته وبنته 

بجد كان حد حبيته واحترمته جدا جدا وفرحت لما شفته مع انى حتى مش سلمت عليه ولا اخد باله منى.

وانا راجعه كمان قابلت العيال صحابى بتوع طب اللى مش شفتهم بسبب ظروف الدراسه ولو حتى صدفه بقالى حوالى سنه وكانت قعدتهم زى العسل فى الباص.

أهو كان يوم حلو وخلاص وكنت حاسه نفساويتى مرتاحه جدا الحمد لله.

الدور على يوم الاربع ربنا يستر

C U

Don't forget me from Eldo3a2
:)

تانى مصيبات ترم أول

كنت ناويه انى اجى كل يوم حد واربع بعد الامتحان هنا واحتفظ بذكرى كل امتحان علشان طول ماالمدونه دى موجوده انا افضل ابغض الترم ده لا السنه بحالها.

بس امبارح بقى ماقدرتش خالص كنت راجعه عندى صداع مزمن ومنهكه من التعب لدرجه مش قادره افتح عنيا.

والمشكله انى ماقدرتش انام منه فرحت اسلم على عمو اللى مسافر خلاص وعز عليا اوى انه خلاص هيمشى بس هو فرحنى بخبر كويس انه وهو مسافر هينزل فى السعوديه يعمل عمره لبابا وبعدين يكمل سفره. انا بوسته على الحكايه دى بصراحه ودعيت ربنا انى يقدرلى انا كمان احج لبابا وده طبعا لما احج انا الاول :)

المهم دلوقت احكى بقى الموجز.

الماده دى كانت أسوأ المواد من حيث ظروفها لاكتر من سبب.

اولا لانها كان مقرر علينا فيها مرجعين مش واحد ومش كتب عاديه.

وثانيا لان الدكتور اساسا مكنش بيشرح هو كان بسلامته مقسم المنهج على عدد الجروبس اللى فى الدفعه وكل جروب يذاكر شابتر ويعمل فيه بريزنتيشن ويجى يشرحه للباقيين. وللاسف مرجع فيهم كان عايز دكتور طبيب اللى يذاكره مش مهندس لانه عامل زى الاناتومى بتاع طب وبيتكلم عن تهيئه وضع العمال ف المنشآت الصناعيه فحكايه فهمه كانت صعبه او مستحيله.

وثالثا المرجع اللى كان شغل المشروع بتاع الماده فيه الدكتور نفضله وجاب منه سؤال واحد فى الامتحان وجاب اربع اسئله فى التانى اللى هو اساسا كان كلامنا فيه كله نظرى والدكتور مش شرح فيه ولا مسأله وفى الاخر جاب الامتحان كله مسائل.

الكارثه الكبيره ان الدفعه كلها كانت لاول مره بتذاكر الماده فى اليومين اللى قبل الامتحان لاننا لو كنا حاولنا ننقذها قبل كده كنا ضيعنا وقت الخمس مواد الباقيين.

مروا على الدفعه كلها يومين مايعلم بيهم الا ربنا وانا معرفش كانت شحنه برود نازله عليا او هدايه ربانيه معرفش لحد العصر اليوم اللى قبل الامتحان حسيت انى عندى مغص وهموت من القلق لدرجه فقد التركيز.

استعنت كتير بالقرآن والصلاه لكن القلق كان صعب بجد.

حظى السئ كان ان الدنيا كلها مقسمه نفسها مجموعات وكل واحد يذاكر شابتر او اتنين ويجى يشرح مسائلهم للباقيين خصوصا ان الامتحان open book يعنى مش محتاجين نحفظ بس نفهم لكن مشكلتى ان اللى كانت معايا كانت عبير وهى تعبت اليومين دول واضطريت انا اشيل الليله لوحدى علشان اشرحلها كمان قبل الامتحان وبدال ماهى تشيل عنى 3 شابتر شالت واحد ومش كملته كمان وانا كنت ضايعه.

يمكن ربنا اعانى جدا ووقف معايا وحسيت ان دعوات الناس نفعتنى لما لحقت فى اليومين اخلص كل الشابترز وكنت لاول مره اذاكرها بس الضغط على اعصابى كان بشع.

اسوأ مافى الموضوع ان الدكتور جاب الامتحان بشع بجد وتناسى كل الظروف اللى هو يعرفها كويس وكل الدفعه كانت طالعه اما مهيسين او وشهم احمر من الغيظ والقلق والخوف من السقوط وكله بيقول حسبى الله ونعم الوكيل.

انا شخصيا كنت طالعه مهيسه اه لكن حاسه انى حليت افضل ماتوقعت بكتير.

اللى غاظنى بجد ان الدكتور جه يشوف استفساراتنا فى الامتحان ولقيناه مش مدرك ان فى سؤالين هو حاططهم احنا عرفنا رقم الشابترز بتاعتهم بالشبه بتاع الكلام وماكناش عارفين هنعمل فيهم ايه اصلا ولا ايه قوانينهم علشان نخرجها من الكتاب.

وهو كل مانسأله يقول دول سهلين ياجماعه انتوا بتستهبلوا يعنى مش مدرك اساسا ولا معترف بأنه افترى علينا بجد فيهم.

المشكله كمان انه جايب داتا كتير ناقصه فى الامتحان وانا كل مااحس ان فى حاجه ناقصه اقول اكيد انا مش فاهمه واقول مش هوقف نفسى انا هفترض اى رقم مش عارفه اطلعه ولما شرف بسلامته ارض اللجنه لقيته بيقول assume اى داتا ناقصه لما الناس كمان اشتكوا من انهم فى حاجات مش عارفين يطلعوها وان فى اسئله مش مفهومه عرفت انى كده فى السليم.

الحاجه الوحيده اللى ريحت ضميرى هى انه قبل مايمشى قال اى حد عنده سؤال تانى قبل ماامشى قلته روح خلاص يادكتور ياريتك ماكنت جيت :)
بصلى وضحك باستغراب قلتلته اه ياريتك ماجيت ده انا فى المسأله الاولى كان عندى حل اكتبه مجيك ده خلانى مش عارفه هكتب ايه؟!

والله مجيك ده واقف علينا بخساره
الراجل بصراحه قدر اننا فى امتحان واعصابنا تعبانه وقالى حلى يامصيبه وانتى ساكته :))

عندى يمكن حاجه مش فاهماها
ليه دايما بيجيلى صداع مزمن فى قلب اللجنه وبجد بيفقدنى جزء كبير من تركيزى ومع كده بنسى اخد اى مسكن او اسبرين معايا وبقعد اضرب دماغى فى الديسك وانا بمتحن؟!

بس انا برضه اروبه وتخلصت منه بأنى نمت من 9 امبارح ل 9 النهارده يعنى 12 ساعه متواصله ولسه هبقى اكمل اخر النهار :)

الدور على ماده يوم الحد
ربنا يستر وهحكى حكايتها الغريبه هى كمان المره الجايه فى التقرير التالى.

C U
Don't forget me from eldo3a2
:)