اول الامتحانات

وأخيرا خلص امتحان ال logistics

الماده اللى كانت عاملالى توتر وتعب اعصاب ونايمه قايمه احلم بيها واسمعها لنفسى فى الحلم لانى خايفه انساها من كتر ماهى كميه بشعه ومتشابه وقابله للنسيان

رعلى الرغم من ان الامتحان كان بايخ ورزل ورخم وطويل ورغم برضو اننا بنمتحن الساعه 1.30 يعنى والناس العاديين فى وقت القيلوله
ورغم برضو كميه التعب العجيبه اللى حاسه بيها بعد ماالامتحان خلص وكأنى لعبت ماتش كوره من شوطين وانا بقالى 5 سنين مانزلتش ملعب
بس انا مبسوطه لانى حاسه انى فرغت اكتر من نص المخزون اللى فى دماغى من تفكير وذاكره ويجى ربع الضغط اللى كنت فيه والقلق اللى كان فى قلبى

ربنا يعدى الباقى على خير
وربنا يهد دكتور عادل بتاع المشروع اللى مابقاش وراه الا حرقه دمنا

وربنا يبعد ظلمه عنى لانى واقعه تحت تهديدات معيشانى اوهام كتير بتقول انى احتمال مش بعيد ابدا ابدا انى مش اتخرج الترم ده وانى لاسباب عبيطه هقعد للسنه الجايه لمجرد ان دكتور عادل ماسك الكنترول وفى ايده يشيلنى الترم

ربنا يستر مش عارفه اخلص من القلق اللى حاصلى بسبب الموضوع ده

ربنا يعدى الترم ده على خير ومايحكمش فيا ظالم زى عادل
عندى حكاوى كتير كتير عن مسرحيات بتحصلى بس انا مطحونه لدرجه انى مش فاضيه اتكلم او اكتب او حتى اشغل بالى باللى بيحصل معايا وحواليا من الناس

دعواتكوا ومااضمنش انى اقدر ادى تقرير عن كل امتحان كل حد واربع زى الترم الاول بس اصل الترم ده تحفه والضغط فيه ابشع من الاول كمان

دعوااااات